АҚШ президенти Жо Байден маъмурияти Исроил ва Ливаннинг “Ҳизбуллоҳи” гуруҳи ўртасидаги можаро кучайишидан хавотирланмоқда, деб ёзади Politico АҚШнинг икки юқори мартабали расмийсига таяниб. Оқ уйда воқеалар ривожланишининг мумкин бўлган сценарийларидан бири кенг кўламли минтақавий уруш ҳисобланади.
Минтақадаги сўнгги воқеалар - Ливандаги “Ҳизбуллоҳ” пейжерлари ва рацияларининг портлашлари, ракета зарбалари ва ташкилот қўмондонининг ўлдирилиши — Исроил ҳарбий кампаниясининг янги босқичи бошланиши сифатида баҳоланмоқда. Америка расмийларининг айтишича, Вашингтон кескинлашувнинг олдини олиш учун Исроил вакиллари билан музокаралар олиб бормоқда.
Бироқ АҚШ вазият ёмонлашиши мумкинлигини кутмоқда, дейди Politico манбалари. Исроил “Ҳизбуллоҳ”га босим ўтказиб, муаммони дипломатик йўл билан ҳал қилишга ва Ливаннинг зарбалари сабабли шимолга кўчирилган исроилликларни қайтаришга уринмоқда.
Шу билан бирга, Оқ уй можарони тинч йўл билан ҳал қилиш имкониятини расман қайд этади. “Исроил-Ливан чегарасида уруш муқаррар эмас ва биз унинг олдини олиш учун қўлимиздан келган барча ишни қилишда давом этамиз”, деди Оқ уй Миллий хавфсизлик кенгашининг стратегик алоқалар бўйича координатори Жон Кирби.
17 ва 18 сентябрь кунлари Ливанда “Ҳизбуллоҳ” аъзоларининг юзлаб пейжерлари, шунингдек, симсиз алоқа ва электроника воситалари портлаб кетди. Оқибатда 30 дан ортиқ одам ҳалок бўлди, 2 мингдан ортиқ киши жароҳат олди. Бу воқеадан сўнг “Ҳизбуллоҳ” Исроил шимолига катта ҳужум уюштирди ва Исроил ҳарбийлари Байрут ҳаракати қўмондони Иброҳим Оқилни йўқ қилганини эълон қилди.
Изоҳ (0)