Исроил мудофаа кучлари Ғазо ва Ливанга зарба беришда оқ фосфорли ўқ-дорилардан фойдаланган, деб маълум қилди Human Rights Watch инсон ҳуқуқлари ташкилоти.
Бу ҳақда ҳуқуқ ҳимоячилари 10—11 октябрь кунлари шундай снарядлар қўлланганини тасдиқловчи видеоёзувларга таяниб хабар бермоқда. Кадрларда Ғазо шаҳар порти ва Исроил—Ливан чегарасидаги икки аҳоли пункти устида артиллерия ўқларидан отилган оқ фосфорнинг бир неча бор чақнаши акс этган, дейди HRW вакиллари.
Оқ фосфор кучли куйишга олиб келади, шунингдек, инсон саломатлигига узоқ муддатли зарар етказиши мумкин. HRW таъкидлашича, бу кимёвий қурол ҳисобланмайди, чунки у асосан заҳарли модда эмас, балки иссиқлик ва олов орқали ишлайди.
Оқ фосфор нафақат ёндирувчи қурол сифатида, балки қўшинлар ҳаракатини маскировка қилиш ва инфрақизил оптикага халақит берадиган тутун яратиш учун ҳам қўлланади.
Исроил армияси 2008—2009 йилларда “Қуйма қўрғошин” операцияси пайтида оқ фосфорли снарядлардан фойдаланган. Ўшанда Исроил Ташқи ишлар вазирлиги улардан тутун пардаси яратиш учун махсус фойдаланилганини даъво қилган, бироқ HRW фаоллари Ғазо секторидаги тинч аҳоли орасида қурбонлар борлигини ҳужжатлаштирган.
Шундан сўнг, 2013 йилда Исроил Олий судида мамлакат ҳарбийлари энди аҳоли пунктларида оқ фосфордан фойдаланмаслигини айтди. “Икки тор доирадаги вазият” бундан мустасно қилиниб, бундай вазиятлар фақат судьяларга маълум қилинди.
Изоҳ (0)