ҲАМАС раҳбари ўринбосари Солиҳ ал-Арурийнинг Байрутда ўлдирилиши ортидан Ливан ҳукумати эҳтимолий қарши ҳужумнинг олдини олиш учун “Ҳизбуллоҳ” билан алоқа ўрнатмоқда. Бу ҳақда Ливан медиасига таяниб, Bild хабар берди.
Ливан ташқи ишлар вазири вазифасини бажарувчи Абдуллоҳ Бу Ҳабибнинг сўзларига кўра, ҳукумат “Ҳизбуллоҳ” жангчиларини жавоб қайтармасликлари кераклигига ишонтиришга ҳаракат қилмоқда.
Шу кунгача Солиҳ ал-Арурий Ғазо секторида уруш бошланганидан бери ҳалок бўлган энг юқори мартабали ҲАМАС амалдори ҳисобланади. ҲАМАСнинг айтишича, Байрут чеккасида дрон ҳужуми оқибатида етти киши, жумладан, исломий гуруҳнинг қуролли қанотининг икки етакчиси ҳалок бўлган.
ҲАМАС вакиллари воқеада Исроил армиясини айблади, “Ҳизбуллоҳ” эса қотилликка жавоб қайтаришга ваъда берди. “Ҳизбуллоҳ”ни қўллаб-қувватловчи Эрон расмийлари Солиҳ ал-Арурийга қилинган ҳужум кескинликни кучайтириб, салбий оқибатларга олиб келишини билдирди.
ҲАМАС Солиҳ ал-Арурийнинг ўлдирилиши ортидан гаровга олинганларни озод қилиш бўйича Исроил билан музокаралар музлатилганини эълон қилди. Шунингдек, улар қотилликни “террорчилик ҳаракати” деб таърифлаб, буни Ливан суверенитетини бузиш, Исроилнинг фаластинликларга нисбатан душманлигини кучайтириш деб баҳолади.
Изоҳ (0)