Ливанда Қуръонни ушлаб турган Россия президенти Владимир Путин сурати туширилган билбордлар пайдо бўлди. Бу ҳақда “РИА Новости” хабар берди.
Маълум қилинишича, мамлакатнинг қатор шаҳарларида билбордлар пайдо бўлган. Уларда Россия раҳбари мусулмонларнинг муқаддас китобини ушлаб тургани акс этган. Унинг остига “Динларнинг қўриқчиси ва ҳимоячиси” деб ёзилган.
Ушбу акция ташкилотчиси “Росливан” Россия—Ливан ҳамкорлиги идораси бўлиб, унинг раҳбари Муҳаммад Насрутдиннинг сўзларига кўра, Путин Швецияда Қуръон ёқиб юборилиши фонида динларга қандай муносабатда бўлиш кераклигини “бутун дунёга кўрсатган”.
У Ливанда Россия президентидан динлар, хусусан, ислом ҳақидаги позицияси учун миннатдорлигини билдирган.
“У Швецияда содир бўлган воқеани қоралади. Бу шунчаки позиция эмас, балки кўп маъноларни ўз ичига олган қадамдир. У Қурбон ҳайитида масжидни зиёрат қилиб, Қуръонни қўлига олиб, Россияда бу муқаддас китобга ҳурматсизлик жиноятдир, деди”, — таъкидлайди у.
Эслатиб ўтамиз, аввалроқ Россиянинг Кабардино-Балкария республикасида номаълум эркак масжидда Қуръоннинг бир нечта нусхасини ёқиб юборганди. Ҳодиса 2 июлга ўтар кечаси содир бўлган. Эркак маҳаллий масжидга борган ва Қуръон нусхаларига бензин сепиб, уни ёқиб юборган. Чегемский тумани раҳбари Юра Борсов воқеада диний мотив йўқлигини айтган.
Айбланувчи “ички овоз” сабабли шундай қилганини айтган. Эркакка нисбатан қандай жазо тайинлангани аниқ эмас.
28 июнь куни Россия президенти Владимир Путин мамлакатда Қуръонга ҳурматсизлик бошқа баъзи мамлакатлардан “фарқли равишда” жиноят эканини эслатганди.
Изоҳ (0)