HAMASning Livandagi rahbari halok bo‘ldi

Isroil hujumi oqibatida HAMAS harakatining Livandagi rahbari Fath Sharif Abu al-Amin halok bo‘ldi. Bu haqda Al Mayadeen xabar berdi.

Tir shahridagi falastinlik qochqinlar lageridagi Fath Sharif uyiga hujum qilingan. Isroil hujumi oqibatida u bilan birga xotini, o‘g‘li va qizi ham vafot etgan.

“HAMAS Livandagi Islomiy qarshilik harakati yetakchisi va harakatning xorijdagi rahbariyati a’zosi Fath Sharif Abu al-Amin uchun qayg‘uradi. U Livan janubiga qilingan hujum paytida o‘zi va oilasiga qarshi qaratilgan terrorchilik operatsiyasidan so‘ng halok bo‘ldi”, deyiladi HAMAS bayonotida.

Ba’zi manbalarning xabar berishicha, al-Amin Livandagi BMTning Falastinlik qochqinlarga yordam berish agentligi maktab o‘qituvchilari kasaba uyushmasining rahbari lavozimida ishlagan.

So‘nngi kunlarda Isroilning Livandagi “Hizbulloh” rahbariyati va HAMAS a’zolarini nishonga olishi kuchaydi. “Hizbulloh” yetakchisi Hasan Nasrulloh 28-sentyabr kuni Isroil harbiy-havo kuchlarining Bayrutdagi yerosti qarorgohiga uyushtirgan hujumida halok bo‘ldi. Yahudiy armiyasi u bilan birga 20 nafar qo‘mondon ham qurbon bo‘lganini ma’lum qildi.

28-sentyabr kuni Bayrutning Daxye rayoniga qilgan hujumida “Hizbulloh”ning yuqori martabali a’zosi Nabil Kauk o‘ldi. U guruhning “profilaktik xavfsizlik bo‘limi” qo‘mondoni va ijroiya kengashi a’zosi bo‘lgan. 

Isroil armiyasi 29-sentyabr kuni tunda Bayrut janubi-g‘arbidagi kvartirani nishonga oldi. Falastin Ozodlik xalq frontining siyosiy byurosi a’zolari Nidal Abdel Al va Imad Auda yo‘q qilingani haqida ma’lumot berilgan. mazkur ma’lumot hali tasdiqlanmagan.