Ливаннинг юқори мартабали расмийси аноним тарзда Исроил армияси ва “Ҳизбуллоҳ” ўртасида кенг кўламли уруш бўлиши мумкинлиги ҳақида фикр билдирди. Бу ҳақда Тhе Washington Post хабар берди.
“Ҳукумат сифатида биз 'Ҳизбуллоҳ'га Ливан урушдан омон қолмаслигини айтамиз. Улар эса:'Тушунамиз, лекин ҲАМАСнинг қулашига йўл қўя олмаймиз' деб жавоб беради”, — дейди расмий.
Амалдорнинг таъкидлашича, Ғарб давлатлари “Ҳизбуллоҳ”ни Исроилдаги урушга аралашмасликка чақирмоқда.
“Бизнинг жавобимиз шуки, АҚШ Исроилга Ғазога кенг кўламли қуруқлик босқинни амалга оширмаслиги учун босим ўтказиши керак”, — деди ливанлик мулозим.
“Ҳизбуллоҳ” етакчиси Ҳасан Насруллоҳ 7 октябрдан буён сукут сақламоқда. Парда ортида бошқа партияларнинг Ливан расмийлари томонидан Исроил билан жангга киришмаслик учун “Ҳизбуллоҳ”га босим кучайган.
2006 йилда “Ҳизбуллоҳ” ва Исроил ўртасидаги уруш пайтида “Ҳизбуллоҳ”ни кенг жамоатчилик қўллаб-қувватлаганди.
“Ҳозир вақти эмас”, — дея қўшимча қилди Ливан расмийси.
2006 йилдаги 34 кунлик урушдан сўнг, Форс кўрфази давлатларидан қайта қуриш учун Ливанга пул тушган. Расмийга кўра, “ҳозир бой араб давлатлари пул беришни тўхтатган”.
2006 йилдан бери Исроил, агар “Ҳизбуллоҳ” урушга киришса, жавоб ҳалокатли бўлишини иддао қилиб келади. Исроил Бош вазирининг миллий хавфсизлик бўйича маслаҳатчиси Тзахи Ханегби 14 октябрь куни огоҳлантиришни такрорлаб, “Ҳизбуллоҳ” ҳаракатининг кучайиши Ливанни “ҳалокатга” олиб келишини айтган.
Изоҳ (0)