Ливан Исроил шимолига 140 та ракета учирди — Исроил Мудофаа вазирлиги

Исроил мудофаа кучлари мамлакатнинг шимолий қисмига Ливан томонидан 140 та ракета отилганини маълум қилди.

Қурбонлар ҳақида маълумот берилмаган. Ҳужумлар натижасида мамлакатнинг бир қанча ҳудудларида ёнғинлар содир бўлди. The Times of Israel 150 та ёнғин ўчоғи юзага келгани ҳақида хабар берди.

Исроил Мудофаа вазирлигининг хабар беришича, Голан тепаликлари, Сфат ва Юқори Галилеяга ҳужум қилинган. Дастлаб 120 та ракета учирилди, кейин Мейрон ва Нетуа ҳудудларига яна 20 та ракета учирилди. Исроил ҳарбийлари баёнотида, баъзи ракеталар ҳаводаёқ тутиб олишга муваффақ бўлингани айтилади. Аниқ рақам айтилмаган.

Исроил бунга жавобан Ливаннинг “Ҳизбуллоҳ” гуруҳининг Айтарун, Кфаркела, Майс ал-Жабал, Таййиб, Одайсса ва Ярун қишлоқларидаги нишонларига зарба берди. Қайд этилишича, зарбалар Ливаннинг барча жанубий ҳудудлари бўйлаб амалга оширилган.

17 сентябрь куни Ливанда Ҳизбуллоҳ аъзолари ишлатадиган юзлаб пейжерлар портлаб кетди. 18 сентябрь куни бутун мамлакат бўйлаб бошқа электрон қурилмалар — ноутбуклар, рациялар ва портатив алоқа ускуналари портлашни бошлади. “Ҳизбуллоҳ” бу ҳужум жавобсиз қолмаслигини маълум қилганди.