АҚШ давлат котиби Энтони Блинкен Давосдаги Жаҳон иқтисодий форуми арафасида Украина президенти Владимир Зеленскийга Америка раҳбарияти Киевга ёрдам беришда давом этишига ваъда берди.
Унинг сўзларига кўра, Қўшма Штатлар Европа давлатлари ҳукуматлари ҳам худди шундай қарор қабул қилишига ишонади.
“Биз Украинани қўллаб-қувватлашни давом эттиришга содиқмиз ва бу борада ишлаш учун Конгресс билан жуда яқин ҳамкорлик қиламиз”, — деди Блинкен.
Учрашувда АҚШнинг миллий хавфсизлик бўйича маслаҳатчиси Жейк Салливан ҳам иштирок этди. Унинг сўзларига кўра, Қўшма Штатлар ва унинг иттифоқчилари “Россиянинг мағлубиятини ва Украинанинг ғалабасини таъминлаш” ниятида.
“Сиз Конгресс ҳақида гапирдингиз. Биз, албатта, сизнинг қўллаб-қувватлашингизга, улкан қўллаб-қувватлашингизга ишонамиз”, — деб жавоб берди Зеленский.
2022 йил 24 февралдан бери Қўшма Штатлар Украинага 44 миллиард долларга яқин ҳарбий ёрдам юборди. 2023 йил 27 декабрда Америка президент маъмурияти Конгресс томонидан маъқулланган 250 миллион долларлик ҳарбий ёрдам пакетини эълон қилди. Ҳозир Конгрессда республикачилар ва демократлар ўртасида Украинани қўллаб-қувватлаш борасида келишмовчилик бор.
Изоҳ (0)