“Ҳизбуллоҳ” етакчиси Ҳасан Насруллоҳ 3 ноябрь, жума куни Исроил—ҲАМАС уруши бошланганидан бери биринчи марта баёнот беради. Бу ҳақда BBC хабар берди.
Оммавий ахборот воситаларининг ёзишича, “Ҳизбуллоҳ” жума кунги баёнотгача Исроилга армияни тўлиқ олиб чиқиб кетиш ва Ғазо секторини бомбардимон қилишни якунлашни талаб қилган. Бунга жавобан Исроил ҲАМАСдан кейин дарҳол “Ҳизбуллоҳ” билан шуғулланишга ваъда берган.
Исроил ҳарбийлари Ливан жанубидаги чегарадош ҳудудларнинг минглаб аҳолиси “Ҳизбуллоҳ уларга қарши уруш бошлашидан” қўрқиб, у ердан қочиб кетаётгани ҳақида хабар берди.
7 октябрь куни ҲАМАС Исроилга ҳужум қилганидан сўнг, Эрон ҳомийлигидаги Ливандаги “Ҳизбуллоҳ” гуруҳи Исроил билан икки марта жанг қилган бўлса-да, йирик босқиндан ўзини тийди.
“Ҳизбуллоҳ” жангчилари вақти-вақти билан Исроил шимолидаги чегара ҳудудларига ракеталар ва кичик қуроллардан ўқ узмоқда. Исроил армияси бунга жавобан “Ҳизбуллоҳ” жангарилар жойлашган ҳудудларга вақти-вақти билан зарбалар бермоқда. Ҳозиргача бу отишмалар маҳаллий характерга эга.
Насруллоҳ Исроил вақти билан соат 15:00 да “Қуддус йўлида ҳалок бўлган шаҳидлар”ни шарафлаш маросимида нутқ сўзлаши режалаштирилган. Эрон Ислом инқилоби қўриқчилари корпусининг Қудс кучлари қўмондони Эсмоил Қаани Исроил билан кенгроқ қарама-қаршиликни мувофиқлаштириш учун 8 октябрдан бери Ливанда экани айтилмоқда. “Ҳизбуллоҳ” манбалари Ливандан Исроилга ҳужум қилиш масаласида сўнгги сўзни “Ҳизбуллоҳ” етакчиси Насруллоҳ айтишини маълум қилди.
Изоҳ (0)