АҚШ президенти маъмурияти Туркия орқали Эрон ва Ливандаги “Ҳизбуллоҳ”га огоҳлантириш юборди. Бу ҳақда америкалик расмийларга таяниб, The New York Times хабар берди.
Огоҳлантиришга кўра, агар Исроилга ҳужум қилинса, АҚШ ҳарбий аралашувга тайёр. АҚШ давлат котиби Энтони Блинкен Американинг иккита самолёт ташувчиси минтақага юборилганига қарамай, Эрон билан тўқнашувга интилмаётганини айтмоқда.
“Биз Эрон билан зиддиятга боришга интилмаяпмиз – биз буни аниқ айтдик. Аммо хоҳ ҳарбий, хоҳ фуқаролик ходимларимиз бўлсин, уларни ҳимоя қилиш учун ҳамма нарсани қиламиз”, — деди Блинкен.
3 ноябрь “Ҳизбуллоҳ” етакчиси Ҳасан Насруллоҳ Исроил ва ҲАМАС ўртасида уруш бошланганидан бери биринчи марта оммавий нутқ сўзлади. Унинг сўзларига кўра, гуруҳ 8 октябрь куни Исроилга қарши жанговар ҳаракатларга қўшилган. Насруллоҳ Исроил армияси Ливанга қарши уруш бошласа, бу Исроилнинг бутун мавжудлигидаги “энг катта хатоси” бўлишини қўшимча қилган.
Насруллоҳнинг сўзларига кўра, Исроилнинг шимолий чегарасида воқеалар ривожланишининг барча сценарийлари” амалга ошиши мумкин, бироқ у “Ҳизбуллоҳ”нинг урушга кириши ҳақида аниқ гапирмаган.
Изоҳ (0)