Eron Qo‘shma Shtatlar bilan muzokaralarni qayta boshlashga tayyor, ammo bu borada ishonch masalasi mavjud. Bu haqda Eron prezidenti Mas’ud Pezeshkiyon amerikalik jurnalist Taker Karlsonga bergan intervyusida ma’lum qildi.
“Muzokaralarni qayta boshlashda bizda hech qanday muammo yo‘q. Biroq muzokaralarni qayta boshlash borasida bir shart bor”, deya ta’kidladi Pezeshkiyon.
“Qo‘shma Shtatlarga yana qanday ishonsak bo‘ladi? Muzokaralarga qaytganimizda, muzokara jarayonida Isroil rejimiga bizga yana hujum qilishga ruxsat berilmasligiga qanday ishonch hosil qilishimiz mumkin?”, dedi Eron prezidenti.
Shuningdek, u Isroilning harakatlari natijasida “bartaraf etilishi lozim bo‘lgan inqiroz” yuzaga kelganini ta’kidlagan.
“Aytganimdek, yengib o‘tishimiz kerak bo‘lgan inqiroz bor. Va muzokaralarni qayta boshlash uchun shart mavjud”, deya qo‘shimcha qildi Pezeshkiyon.
Eron prezidenti Tehron Yaqin Sharq mintaqasida tinchlik bo‘lishini xohlashi va Vashington bilan barcha kelishmovchiliklarni muloqot orqali hal etishga tayyorligini, biroq uning fikricha, Isroil rahbariyati bunga qarshi ekanini bildirgan.
“Ishonchim komilki, biz ziddiyatlarimizni osonlikcha hal qilishimiz va AQSH bilan kelishmovchiliklarni muloqot orqali bartaraf etishimiz mumkin, ammo, afsuski, Netanyaxu bu diplomatik sa’y-harakatlarni barbod qildi”, dedi u intervyu davomida.
Pezeshkiyonning ta’kidlashicha, Eron hech qachon “huquqlarni hurmat qilish”dan va tinch-osoyishta hayot kechirishdan boshqa narsani istamagan, ammo zarur bo‘lganda o‘zini himoya qilishga qodir.
Uning so‘zlariga ko‘ra, AQSH prezidenti Donald Tramp Yaqin Sharq mintaqasi muammolarini hal qilish va uni tinchlikka olib chiqishga yordam berishi ham, “uni abadiy urushlarda qoldirishi” ham mumkin.
Shuningdek, prezident Eron oliy rahnamosi Oyatulloh Ali Xomanaiy avvalroq unga AQSHning Eronga sarmoya kiritishiga hech qanday to‘siq yo‘qligini aytganini ma’lum qilgan.
“Hech qanday cheklov yo‘q va hech narsa amerikalik investorlarning Eronga kelishi va sarmoya kiritishiga to‘sqinlik qilmaydi. Biroq Isroil voqealarning bunday rivojlanishini istamaydi”, deya ta’kidladi u.
Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.
Izoh (0)