Eron tomonidan Isroilga uchirilgan dronlarni tutib olishda mintaqaning bir qancha davlatlari, jumladan, Saudiya Arabistoni ishtirok etgan. Bu haqda Fors ko‘rfazi manbalariga tayanib Israel Hayam xabar berdi.
Manbalarga ko‘ra, Saudiya Arabistoni mintaqaviy havo hududida, jumladan, Iroq va Iordaniya osmonida dronlarni tutib oluvchi vertolyotlarni joylashtirgan. Ba’zi dronlar Isroil tomon harakatlanishda davom etishi mumkin edi. Biroq ular Saudiya suvereniteti tahdid ostida qolmasligi uchun erta tutib olingan.
Saudiya Arabistoni kuchli harbiy havo kuchlariga ega bo‘lib, u asosan AQSHda ishlab chiqarilgan zamonaviy qurollar, samolyotlar va himoya tizimlariga tayangan. 2017-yilda AQSH prezidenti Donald Trampning birinchi prezidentlik davrida Saudiya valiahd shahzodasi Muhammad bin Salmon bilan yirik qurol-yarog‘ bitimi imzolangan. Bu bitim keyinchalik 2025-yil Trampning mintaqaga qilgan tashrifi chog‘ida kengaytirilgan.
Saudiya Arabistoni rasmiy ravishda hujumlarning oldini olishda ishtirok etganini tasdiqlamagan. Aksincha, Eron hududiga hujum qilgani uchun Isroilni qoralagan. Saudiya Arabistoni o‘z havo hududidan Erondagi nishonlarga zarba berish uchun foydalanishga ruxsat bermasligini ta’kidlagan.
Eron bilan kechgan 12 kunlik urush davomida bir nechta davlatlar mintaqa osmonini himoya qilish uchun harakat qildi. Ular orasida Iordaniya ham bor. U asosan o‘z havo hududida harbiy havo kuchlari orqali faollikni ko‘rsatdi, deyiladi xabarda.
Shuningdek, Buyuk Britaniya va Fransiya ham havo hududida operatsiyalar o‘tkazgani aytilmoqda. Eng faol ishtirokchilar esa Isroil bilan birgalikda urushga kirishgan AQSH bo‘ldi.
Isroil 13-iyundan boshlab Eronga tinimsiz hujum qilib, uning yadroviy obyektlari, mudofaa tizimlari, yuqori martabali harbiy amaldorlari va yadrochi olimlarini nishonga oldi. Hujumlar oqibatida kamida 627 kishi, jumladan, ko‘plab tinch aholi vakillari halok bo‘ldi, deb xabar berdi Eron Sog‘liqni saqlash vazirligi.
AQSHning urushdagi ishtiroki
22-iyun kuni AQSH Isroilning harakatlariga qo‘shilib, uchta asosiy obyektga — Fordo, Natanz va Isfahonga aviazarbalar berdi. Hujumda bunker bombalardan ham foydalanildi. Markaziy razvedka boshqarmasi boshlig‘i Jon Retkliff operatsiya Eron yadroviy dasturiga jiddiy zarar yetkazganini ma’lum qildi. Zarbalardan ko‘p o‘tmay AQSH prezidenti Donald Tramp Eron va Isroil o‘rtasida o‘t ochishni to‘xtatish rejimi kuchga kirganini e’lon qildi, buni ikkala tomon ham tasdiqladi.
Izoh (0)