Eron prezidenti Mas’ud Pezeshkiyon Xalqaro atom energetikasi bo‘yicha agentlik (MAGATE) bilan hamkorlikni to‘xtatuvchi qonunni imzoladi. Bu haqda Tasnim xabar berdi.
Prezidentning so‘zlariga ko‘ra, qonun 25-iyun kuni “Isroil va AQSHning so‘nggi hujumlariga, shuningdek, MAGATEning bu harakatlarni qoralashdan bosh tortishiga javoban” qabul qilingan. Hujjat hukumatga agentlik bilan hamkorlikni butunlay to‘xtatish majburiyatini yuklaydi.
Yangi qonun MAGATE inspektorlarining Eron hududiga kirishini taqiqlaydi va barcha tekshiruv tadbirlarini to‘xtatadi. Hujjat 1969-yilgi Vena konvensiyasining 60-moddasiga muvofiq ikkita shart bajarilgunga qadar kuchga kiradi: Eron suvereniteti, hududiy yaxlitligi, yadroviy obyektlari va olimlarining xavfsizligini ta’minlash, shuningdek, Yadro qurolini tarqatmaslik to‘g‘risidagi shartnomaning 4-bandiga muvofiq mamlakatning tinch yadro energiyasidan foydalanish huquqini hurmat qilish.
Bu shartlar faqat Eron atom agentligining hisoboti va Milliy xavfsizlik kengashining tasdig‘i bilan rasman tasdiqlanadi. Hukumat qonunning bajarilishi to‘g‘risida har chorakda Majlis va kengashga hisobot berib turishi shart.
Isroil 13-iyundan boshlab Eronga tinimsiz hujum qilib, uning yadroviy obyektlari, mudofaa tizimlari, yuqori martabali harbiy amaldorlari va yadrochi olimlarini nishonga oldi. Hujumlar oqibatida kamida 627 kishi, jumladan, ko‘plab tinch aholi vakillari halok bo‘ldi, deb xabar bermoqda Eron sog‘liqni saqlash vazirligi.
22-iyun kuni AQSH Isroilning harakatlariga qo‘shilib, uchta asosiy obyektga — Fordo, Natanz va Isfahonga aviazarbalar berdi. Markaziy razvedka boshqarmasi boshlig‘i Jon Retkliff operatsiya Eron yadroviy dasturiga jiddiy zarar yetkazganini ma’lum qildi. Zarbalardan ko‘p o‘tmay AQSH prezidenti Donald Tramp Eron va Isroil o‘rtasida o‘t ochishni to‘xtatish rejimi kuchga kirganini e’lon qildi, buni ikkala tomon ham tasdiqladi.
Biroq Eron rasmiylari AQSH zarbalaridan yetkazilgan zarar minimal bo‘lganini, Islom Respublikasining oliy rahbari Ali Xomanaiy esa Eronning Vashington va Tel-Aviv ustidan “g‘alaba qozonganini” e’lon qila boshladi. 25-iyunda Eron parlamenti MAGATE bilan hamkorlikni to‘xtatish to‘g‘risida qaror qabul qilgan edi.
Izoh (0)