AQSH agar Eron yadroviy davlatga aylansa, Isroilni bunkerga qarshi bombalar bilan qurollantirishga tayyor. Bu haqda The New York Post xabar berdi.
Maʼlum qilinishicha, gap Isroilga B-2 ko‘rinmas bombardimonchi samolyotlar va bunkerga qarshi bombalarni berish haqida ketmoqda. Tegishli taklifni AQSH parlamentining ikki vakili — demokrat va respublikachi taklif qilgan. U “Eronning yadro qurolini yaratish dasturiga munosabat bildirish to‘g‘risida”gi qonun loyihasida aks etgan.
Mazkur qonun prezident Trampga “Agar Eron yadroviy qurol ishlab chiqarishga urinsa, Isroil barcha kutilmagan holatlarga tayyor bo‘lishini ta’minlash uchun choralar ko‘rish” imkonini beradi, dedi demokrat Josh Gotxaymer va respublikachi Mayk Louler.
Eron o‘nlab amerikaliklarni, jumladan, harbiylarimizni o‘ldirdi va asosiy demokratik ittifoqchimiz Isroilga bir necha bor hujum qildi. Isroil o‘zini Erondan himoya qila olishi va Eron yadroviy salohiyatini tiklay olmasligini kafolatlashi kerak, degan Gotxaymer o‘z bayonotida.
Ushbu qonun loyihasi prezidentga Isroil harbiylarini o‘qitish, ularni Tehronni jilovlash va dunyoni xavfsizroq joyga aylantirish uchun zarur bo‘lgan vositalar bilan ta’minlash vakolatini beradi, dedi Louler.
AQSH bunker bombalarni Eronga qarshi hujumda qo‘lladi
Isroil 13-iyundan boshlab Eronga tinimsiz hujum qilib, uning yadroviy obyektlari, mudofaa tizimlari, yuqori martabali harbiy amaldorlari va yadrochi olimlarini nishonga oldi. Hujumlar oqibatida kamida 627 kishi, jumladan, ko‘plab tinch aholi vakillari halok bo‘ldi, deb xabar bermoqda Eron Sog‘liqni saqlash vazirligi.
22-iyun kuni AQSH Isroilning harakatlariga qo‘shilib, uchta asosiy obyektga — Fordo, Natanz va Isfahonga aviazarbalar berdi. Hujumda bunker bombalardan ham foydalanildi. Markaziy razvedka boshqarmasi boshlig‘i Jon Retkliff operatsiya Eron yadroviy dasturiga jiddiy zarar yetkazganini ma’lum qildi. Zarbalardan ko‘p o‘tmay AQSH prezidenti Donald Tramp Eron va Isroil o‘rtasida o‘t ochishni to‘xtatish rejimi kuchga kirganini e’lon qildi, buni ikkala tomon ham tasdiqladi.
Biroq Eron rasmiylari AQSH zarbalaridan yetkazilgan zarar minimal bo‘lganini, Islom Respublikasining oliy rahbari Ali Xomanaiy esa Eronning Vashington va Tel Aviv ustidan “g‘alaba qozonganini” e’lon qila boshladi. 25-iyunda Eron parlamenti MAGATE bilan hamkorlikni to‘xtatish to‘g‘risida qaror qabul qilgan edi. 2-iyul kuni prezident Mas‘ud Pezeshkiyon tegishli qonunni imzoladi.
Izoh (0)