Isroil mudofaa armiyasi Yaman husiylariga qarshi “Qora bayroq” nomli operatsiyasini o‘tkazdi. Bu haqda N12 nashri xabar berdi.
Isroil operatsiya doirasida Xodeyda, Salif va Ras-Isa portlariga zarba berdi. Mudofaa vaziri Israel Kats husiylarga tegishli obyektlar hujumga uchrayotganini aytdi. Nishonlar orasida elektr stansiyasi va 2023-yil noyabr oyida Qizil dengizda husiylar tomonidan qo‘lga olingan Galaxy Leader kemasi ham bor.
Men ogohlantirganimdek, Yamanga ham Tehronga bo‘lganidek munosabatda bo‘lishadi, deya ta’kidladi Kats.
Yahudiy armiyasiga ko‘ra, hujumdagi obyektlar Eron tomonidan qo‘llab-quvvatlanayotgan husiylar tomonidan qurol-yarog‘ yetkazib berish uchun qo‘llangan. Isroil hamda xalqaro dengiz savdosiga qarshi “terrorchilik faoliyati” uchun ishlatilgan.
Isroil portlar, kemalar va elektr stansiyasiga qarata qariyb 50 ta raketa va bomba yo‘llagani taxmin qilinmoqda. Operatsiyada 20 ga yaqin qiruvchi samolyotlar ishtirok etgani ma’lum. Bosh vazir Benyamin Netanyaxu husiylarga qarshi operatsiyani Vashingtonga yo‘l olayotgan samolyotida kuzatgan. Hujumdan oldin Isroil armiyasining arab tilidagi vakili Avichay Adrai port aholisi va xodimlarini evakuatsiya qilishga chaqirgan.
“Husiylar” siyosiy byurosi a’zosi Muhammad al-Faroh Isroil hujumini “G‘arb tomonidan qo‘llab-quvvatlangan jinoyatkorona tajovuz” deb atagan. Harakat vakili Yahyo Sariya esa Yamandagi havo mudofaasi hujumni qaytarganini da’vo qilgan.
Isroilning “Qora bayroq” nomli operatsiyasi husiylarning Tel-Avivdagi xalqaro aeroportga hujumi ortidan boshlandi. Husiylar aeroportga hujumni gipertovushli “Falastin-2” raketasi yordamida amalga oshirgan va Lod shahridagi Ben Gurion aeroportiga yo‘naltirilgan. Ko‘zlangan maqsadga erishilgani ma’lum qilingan. Hujum oqibatida aeroport faoliyati to‘xtab qolgan. Husiylar G‘azodagi urush to‘xtamaguncha yahudiy davlatiga hujum qilishlarini ta’kidlagan.
Izoh (0)