Yozgi transfer oynasining ochilishi bilan O‘zbekiston Superligasi jamoalari o‘z tarkibini kuchaytirish uchun faol ishlarni boshladi. Shu bois, hozirgi vaqtda rasman tasdiqlangan transferlar, shuningdek, ehtimoliy o‘tishlar haqida batafsil to‘xtalib o‘tamiz.
“Nasaf” yarim himoyachisi Akmal Mozgovoy Superliganing 15-turi doirasida “Dinamo”ga qarshi kechgan bahsdan so‘ng jamoa bilan rasmiy ravishda xayrlashdi. Avvalroq xabar berilganidek, u yaqin kunlarda Birlashgan Arab Amirliklarining “Baniyas” klubiga o‘tishi kutilmoqda.
Qarshiliklarning albaniyalik hujumchisi Ruben Hebay Jizzaxning “So‘g‘diyona” klubi bilan 1,5 yillik shartnoma imzoladi. Shuningdek, klub “Dinamo”ning braziliyalik futbolchisi Ratinyo va Eronning “Istiqlol” jamoasida to‘p surayotgan qirg‘izistonlik hujumchi Joel Kojo bilan muzokaralarni olib bormoqda. “Ajdarlar” jamoani tark etgan futbolchilarning o‘rnini samarali tarzda to‘ldirishni maqsad qilgan.
“Paxtakor” ham yozgi transferlar oynasida faol harakat qilmoqda. 15-tur doirasidagi “Paxtakor” — “Navbahor” uchrashuvidan keyingi matbuot anjumanida “sherlar” bosh murabbiyi Kamoliddin Tojiyev Bobir Abduxoliqov bilan shartnoma 100 foiz hal bo‘lganini ma’lum qildi.
Bundan tashqari, Toshkent klubi O‘zbekiston milliy terma jamoasi a’zolari — Xojimat Erkinov va Azizbek Turg‘unboyev bilan ham muzokaralarni olib bormoqda.
Qishki transferlar oynasida jamoaga qo‘shilgan braziliyalik yarim himoyachi Jonatan Lukkaning esa “sherlar” safini tark etishi kutilmoqda.
“Bunyodkor” yarim himoyachisi Odil Hamrobekovning esa faoliyatini xorijda davom ettirishi ehtimoli bor. Ijtimoiy tarmoqlarda tarqalgan xabarlarga ko‘ra, Eron chempionatida ishtirok etayotgan Tabrizning “Traktor” klubi futbolchini o‘z safiga qo‘shib olish istagida va bu borada “qaldirg‘ochlar”ga rasmiy taklif yuborgan.
Izoh (0)