Xitoy Yaman qirg‘oqlari yaqinidagi nemis samolyotiga lazer yordamida hujum qilib, ekipajni xavf ostiga qo‘ydi va missiyani barbod qildi. Bu haqda Germaniya Tashqi ishlar vazirligi xabar berdi.
Samolyot Yevropa Ittifoqining fuqarolik kemalarini husiylar hujumidan himoya qilayotgan edi. Shu sababli uchoq Qizil dengizda patrullik qilayotgan bo‘lgan.
Xitoy harbiylari Yevropa Ittifoqining Aspides operatsiyasi doirasidagi nemis samolyotiga qarshi lazer qurolini qo‘lladi. Germaniya xodimlarini xavf ostiga qo‘yish va operatsiyani barbod qilishga urinishlarni mutlaqo qabul qilib bo‘lmaydi, deyiladi Germaniya TIV bayonotida.
Holat yuzasidan nemis diplomatlari Xitoy elchisini tushuntirish berish uchun chaqirtirgan. Spiegel nashri ma’lumotlariga ko‘ra, hodisa Xitoy fregatiga samolyot yaqinlashayotganda yuz bergan. Nemis samolyotiga zarar yetgan-yetmagani hozircha noma’lum.
Hujum Aspides operatsiyasi uchun ijaraga olingan nemis razvedka samolyotiga qarshi amalga oshirilgan. Uni fuqarolik uchuvchilari boshqaradi va u to‘rtta Bundesver askarini olib yurishi mumkin. Samolyotning o‘zi Jibutida joylashgan.
6 va 7-iyul kunlari husiylar (Yaman harakati) aprel oyidan beri ilk bor Qizil dengizdagi ikkita yuk kemasiga hujum qildi. Birinchi holatda ekipaj qutqarilgan, ikkinchisida esa zarba oqibatida ikki kishi halok bo‘lgan, yana ikki kishi jarohatlandi.
Izoh (0)