AQSH hukumati Xitoyning ikki fuqarosini josuslikda gumonlab hibsga oldi. Bu haqda mamlakat Adliya vazirligiga tayanib Associated Press xabar berdi.
Ular AQSH harbiy-dengiz kuchlari va ularning bazalari haqida maxfiy ma’lumotlarni to‘plashda ayblanmoqda. Shuningdek, xitoyliklar AQSH harbiy xizmatchilarini Xitoy Davlat xavfsizlik vazirligi foydasiga yollashga uringanlikda ham gumon qilinmoqda.
Ikkala erkak ham 27-iyun kuni Federal qidiruv byurosi (FQB) va AQSH Harbiy-dengiz kuchlari Jinoyat qidiruv xizmati xodimlari tomonidan qo‘lga olingan. Ulardan biri Oregon shtatida, ikkinchisi Texas shtatining Xyuston shahrida ushlangan.
Tergovga ko‘ra, ular Xitoy razvedkasi topshirig‘i bilan bir qator vazifalarni bajargan, jumladan, maxfiylikni saqlagan holda moliyaviy mablag‘larni o‘tkazishni tashkil qilgan.
Ayblanuvchilar xorijiy razvedka xizmati topshirig‘i bilan harakat qilgan. Bu — Xitoy Kommunistik partiyasining Amerika institutlariga kirib borish va ularning faoliyatiga putur yetkazishga qaratilgan keng ko‘lamli sa’y-harakatlarining bir qismidir. Biz bu urinishlarga chek qo‘ydik va aniq bayon qilamiz: AQSH o‘z hududida josuslik bilan murosa qilmaydi, dedi FQB direktori Kesh Patel.
Ma’lumotlarga ko‘ra, bir necha yil avval ayblanuvchilar AQSH harbiy-dengiz kuchlari obyektlariga tashrif buyurib, u yerda harbiy xizmatchilarning shaxsiy ma’lumotlari yozilgan e’lonlar taxtasini suratga olgan. Keyinchalik ushbu materiallar Xitoy Davlat xavfsizlik vazirligiga topshirilgani aytilmoqda.
Izoh (0)