AQSH prezidenti Donald Tramp Qo‘shma Shtatlarning Afrikadagi mavqeyini mustahkamlash maqsadida bir qator Afrika rahbarlariga “juda katta tijorat imkoniyatlari”ni taklif etishni rejalashtirmoqda. Bu haqda Semafor portali xabar berdi.
“Tramp kelasi hafta Afrikaning beshta rahbarini qabul qilib, Oq uy qit’ada ‘juda katta tijorat imkoniyatlari’ deb atagan masalani muhokama qiladi”, deya ta’kidlandi nashr xabarida.
Portal ma’lumotlariga ko‘ra, Tramp AQSHning Afrikadagi manfaatlarini kuchaytirish va’dasini berib, asosiy e’tiborni qit’adagi muhim foydali qazilma konlarini nazorat qilishga qaratmoqchi.
Ta’kidlanishicha, ko‘plab Afrika davlatlari tayanib kelgan AQSH yordamining keskin qisqarishi ularning Vashington bilan diplomatik munosabatlarining yomonlashuviga olib keldi. Shu bilan birga, Xitoy va Rossiya mintaqadagi o‘z ta’sirini kuchaytirdi.
AQSH prezidenti Donald Tramp Oq uyga qaytganidan so‘ng ilk bor 9-11-iyul kunlari Vashingtonda Afrika davlatlari rahbarlari bilan sammit o‘tkazadi.
Ma’lumotlarga ko‘ra, Amerika poytaxtiga Gabon, Gvineya-Bisau, Liberiya, Mavritaniya va Senegal rahbarlari tashrif buyuradi. Vashington sammitda G‘arbiy Afrika davlatlari bilan foydali qazilmalar sohasidagi hamkorlik, shuningdek, mintaqaviy xavfsizlik masalalarini muhokama qilishni mo‘ljallamoqda.
“Bundan tashqari, kuzda yanada keng ko‘lamli AQSH—Afrika sammitini o‘tkazish rejalashtirilgan”, deya xabar bermoqda Semafor. U sentyabr oyida Nyu Yorkda bo‘lib o‘tishi kutilmoqda.
Ma’lumot o‘rnida, AQSH rahbari Yaqin Sharqqa rasmiy tashrifi davomida Qatar bilan 1,2 trillion dollarlik iqtisodiy bitim imzoladi, Saudiya Arabistoni esa AQSHga 600 milliard dollar sarmoya kiritish majburiyatini oldi.
Izoh (0)