Xitoy tashqi ishlar vaziri Van I Yevropa Ittifoqining bosh diplomatiga Pekin “Rossiyaning Ukrainaga qarshi urushda mag‘lub bo‘lishini qabul qila olmasligini” aytdi. Bu haqda CNN xabar berdi.
Van Ining ta’kidlashicha, bu AQSHning butun e’tibori Xitoyga qaratilishiga sabab bo‘ladi. Vazirning bu bayonoti Pekinning mojarodagi betaraflik pozitsiyasiga zid kelmoqda.
Yevropa Ittifoqi tashqi ishlar vaziri Kaya Kallas Bryusselda 2-iyul kuni Xitoy vakili bilan 4 soatlik uchrashuv o‘tkazgan. Unda “kiberxavfsizlik, noyob minerallar, savdo nomutanosibligi, Tayvan va Yaqin Sharqdagi masalalar muhokama qilingan. Aynan shu uchrashuvda Van Rossiya-Ukraina borasiga o‘z fikrini bildirgandi.
Kaya Kallasning aytishicha, Vanning bu fikrlari Pekin Ukrainadagi urushni davom etishini xohlashini anglatadi. Bu esa Qo‘shma Shtatlarni Xitoy bilan raqobatga e’tibor qaratishdan saqlaydi. Xitoy Tashqi ishlar vazirligining 4-iyul kungi brifingida rasmiy Mao Ningdan Rossiya-Ukraina urushi haqida so‘ralgan.
“Xitoy Ukraina masalasida betaraf. Uning pozitsiyasi obyektiv va izchil. Pekin muzokara, o‘t ochishni to‘xtatish va tinchlikni istaydi. Uzoq davom etgan Ukraina mojarosi hech kimning manfaatiga xizmat qilmaydi. Xalqaro hamjamiyat bilan birgalikda biz ushbu maqsad yo‘lida konstruktiv rol o‘ynashda davom etamiz”, dedi Mao.
Rossiya Ukrainaga keng ko‘lamli bosqinni boshlashidan bir necha hafta oldin Xitoy rahbari Si Szinpin Moskva bilan “cheklovlarsiz” hamkorlik qilishini e’lon qilgandi. Shundan beri ikki mamlakatlarning siyosiy va iqtisodiy aloqalari mustahkamlangan.
Pekin, shuningdek, Rossiyaga harbiy yordam ko‘rsatayotgani haqidagi ayblovlarni rad etgan. Ukraina Xitoyning bir qator kompaniyalariga sanksiyalar joriy etgan. Bunga Pekin Moskvaga dron komponentlarini yetkazib beragani va raketa ishlab chiqarishda yordam ko‘rsatgani sabab bo‘lgan.
Izoh (0)