Rossiyaning NATO davlatlariga qarshi ehtimoliy hujumi qanday boshlanishi va qanday oqibatlarga olib kelishi mumkinligi modellashtirildi. Bu ssenariyni yuqori lavozimli rasmiylar bilan o‘tkazilgan suhbatlarga asoslanib, Bloomberg nashri tuzdi.
Hujum qanday boshlanishi mumkin?
Rossiyaning NATOga bosqini Boltiqbo‘yi mamlakatlaridan boshlanishi mumkin. Biroq Rossiya zarbalari SSSR hududidan tashqaridagi nishonlarga ham yo‘naltirilishi ehtimoli mavjud. Yevropa uchun Moskva bilan urush birinchi yilda 1,5 trillion dollar xarajatga olib keladi.
Hujum soxta bahona yoki gibrid (harbiy-axborot) usuldagi hujum orqali boshlanishi ehtimoli bor. Litva sobiq tashqi ishlar vaziri Gabrielyus Landsbergis taxmin qilishicha, Rossiya Moskvadan Litva orqali Kaliningradga ketayotgan poyezdni to‘xtatib, fuqarolarni himoya qilish bahonasida qo‘shin kiritishi mumkin.
Shuningdek, Rossiya Estoniya va Latviyaga hujum qilishi, Boltiq dengizida flotni joylashtirishi va Boltiqbo‘yi davlatlarining Suvalka yo‘lagida Polsha bilan quruqlikdagi aloqasini uzishi mumkin, deb yozadi Bloomberg (birinchi xarita).
Bunday holatda Boltiqbo‘yi davlatlari NATO shartnomasining beshinchi moddasiga (jamoaviy mudofaa) murojaat qilishi mumkin. Shundan so‘ng Rossiya va ehtimol Belarusga qarshi hujum boshlanadi. Agar NATO kollektiv javob bermasa ham, yaqin atrofdagi Yevropa davlatlari yordam yuborib, Rossiya qo‘shinlariga hujum qilishi mumkin, deb ta’kidlaydi Bloomberg (ikkinchi xarita).
Rossiya bunga javoban Yevropa harbiy bazalari va muhim infratuzilmalariga, jumladan, yirik shaharlardagi nishonlarga zarba berishi mumkin. Agentlik xaritasida Germaniya, Polsha, Shvetsiya va Finlyandiya ehtimoliy nishonlar sifatida ko‘rsatilgan (uchinchi xarita).
Bunday holatda iqtisodiy zarar juda katta bo‘ladi, Boltiqbo‘yi davlatlari bir yil ichida yalpi ichki mahsulotning 43 foizini yo‘qotadi. Yevropa ittifoqining yalpi ichki mahsuloti 1,2 foizga kamayadi, davlat qarzi tezda oshadi. Germaniya, Polsha, Finlyandiya, Shvetsiya ham iqtisodiy zararga uchraydi.
Buyuk Britaniya 0,2 foiz, AQSH 0,7 foiz, Xitoy 0,8 foiz yalpi ichki mahsuloti yo‘qotadi. Rossiya 1 foiz iqtisodiy yo‘qotishga uchrashi mumkin, ammo u allaqachon sanksiyalar tufayli izolyatsiyada bo‘lgani va harbiy xarajatlar iqtisodiy faollikni ko‘rsatib turgani sababli zarbani yengilroq his qiladi.
AQSH prezidenti Donald Tramp bunday holatda javob berishni kechiktirishi va haqiqiy harakatlar o‘rniga Truth Social ijtimoiy tarmog‘ida “TINCHLIKKA” chaqiriq va Yevropaga “VLADIMIR BILAN GAPLASHISH” taklifini joylashtirishi mumkin, deb yozadi Bloomberg.
Moskvaning yadro qurolidan foydalanish bilan tahdid qilishi Yevropaning yadroviy kuchlari bilan javob qaytarishini cheklashi mumkin.
Rossiya katta harbiy kuchlarga ega, Yevropa kuchlari esa bo‘lingan, deb ta’kidlaydi Bloomberg
Finlyandiya, Shvetsiya, Polsha va Germaniya kabi urushga qo‘shilishi mumkin bo‘lgan boshqa Yevropa davlatlari raketa hujumlaridan nisbatan kamroq, ammo sezilarli darajada iqtisodiy zarar ko‘rishi mumkin. Yevropa Ittifoqi uchun iqtisodiy zarba yuqori mudofaa xarajatlari bilan yumshatiladi, ammo blokning yalpi ichki mahsuloti 1,2 foizga qisqaradi va uning qarzi keskin o‘sa boshlaydi.
Yevropa razvedkasining hisob-kitoblari Rossiyaning NATO hududida urush boshlash rejasi borligini ko‘rsatmayapti, deb ta’kidlaydi Bloomberg. Shu bilan birga, Rossiya G‘arbga qaraganda tezroq kuchlarni tiklamoqda va qurol-yarog‘ zaxiralarini ko‘paytirmoqda.
Izoh (0)