Xitoy Hindiston va Pokiston o‘rtasidagi jangovar to‘qnashuvlardan so‘ng o‘z elchixonalari orqali Fransiyaning Rafale qiruvchi samolyotlari savdosiga putur yetkazish uchun axborot kampaniyasini boshladi. Bu haqda Fransiya razvedka xizmatiga tayanib, Associated Press xabar berdi.
Fransiya razvedkasiga ko‘ra, Xitoyning xorijdagi elchixonalaridagi mudofaa attashelari Rafale savdosiga to‘sqinlik qilishga uringan. Ular samolyotlarga buyurtma bergan davlatlarga ularning samaradorligi haqida shubha uyg‘otishga harakat qilgan. Jumladan, Indoneziyaga shunday xabarlar yetkazilgan. Xaridorlarga Fransuz samolyotlari o‘rniga Xitoy texnikasini tanlash taklif qilingan.
Xitoyning axborot kampaniyasi ijtimoiy tarmoqlarda tarqalayotgan virusli postlar, sun’iy intellekt yordamida yaratilgan chalg‘ituvchi tasvirlar va jangovar o‘yinlardan olingan skrinshotlarni o‘z ichiga olgan, deyiladi xabarda.
Razvedka bu materiallar mingdan ortiq soxta akkauntlar orqali tarqatilganini aniqlagan. Xitoy Milliy mudofaa vazirligi bu ayblovlarni “asossiz mish-mishlar va tuhmat” deb baholagan.
May oyida to‘rt kun davom etgan Hindiston-Pokiston to‘qnashuvlari yadro quroliga ega ikki qo‘shni o‘rtasidagi yillar davomidagi eng jiddiy qarama-qarshilik bo‘ldi. Har ikki tomondan o‘nlab samolyotlar ishtirok etdi. Shundan beri mutaxassislar Hindiston tomonidan qo‘llanilgan, jumladan, Rafale qiruvchilarining Pokistonning Xitoyda ishlab chiqarilgan harbiy texnikasiga qarshi qanday natija ko‘rsatganini tahlil qilmoqda.
Rafale va boshqa qurollarning savdosi Fransiya mudofaa sanoati uchun katta daromad manbai bo‘lib, Parij hukumatining Osiyodagi, ayniqsa Xitoy kuchayib borayotgan mintaqalarda, diplomatik aloqalarni mustahkamlashga xizmat qilmoqda.
Fransiya ichki bozori uchun bitta Rafale samolyotining narxi taxminan 100 million AQSH dollariga teng. Biroq eksport qilinayotgan samolyotlar qo‘shimcha qurollar, xizmat ko‘rsatish paketi va ehtiyot qismlar bilan birgalikda 200 million dollargacha borishi mumkin. Hindiston, Birlashgan Arab Amirliklari, Qatar, Misr va Yangi Dehli bilan imzolangan shartnomalarda narx ko‘plab omillarga qarab farq qiladi.
Izoh (0)