Yaponiyada butun kuzatuvlar tarixidagi eng issiq kun qayd etildi. 30-iyul kuni Tamba shahrida harorat 41,2 darajaga yetdi. Bu haqda Reuters xabar berdi.
Bu ko‘rsatkich mamlakatda 2018-yilda o‘rnatilgan va 2020-yilda takrorlangan avvalgi 41,1 darajalik harorat rekordidan oshib ketdi. 40 daraja va undan yuqori harorat Fukutiyama, Maniva va Nishivaki shahrida ham kuzatilgan. O‘tgan hafta Yaponiyada 10,8 mingdan ortiq odam issiqlik urishi bilan kasalxonaga yotqizilgan, 16 kishi esa issiqdan vafot etgan.
Iyun oyida Yaponiya butun kuzatuvlar tarixidagi eng issiq iyunni boshdan kechirdi. O‘rtacha harorat me’yordan 2,34 darajaga yuqori bo‘ldi. Mamlakatda o‘rtacha yillik harorat ketma-ket ikkinchi yil rekord o‘rnatmoqda.
Janubiy Koreyada jazirama oqibatlari
Issiq ob-havo boshqa mintaqalarda ham salbiy oqibatlarga olib kelmoqda. Janubiy Koreyada jazirama tufayli 13 kishi vafot etdi, mamlakatning ko‘plab hududlarida jazirama xavfiga doir ogohlantirishlar e’lon qilindi. Koreya Meteorologiya agentligi ma’lumotiga ko‘ra, 30-iyul kuni Tejon shahrida havo harorati +38 daraja, Seul va Tegu shaharlarida esa +36 daraja bo‘lgan.
Izoh (0)