Rejissyor Kristofer Nolan yangi “Odisseya” filmining bir nechta sahnalarini G‘arbiy Sahroyi Kabirning Marokash nazoratida bo‘lgan qismida suratga olgani tufayli tanqidga uchradi, deb xabar berdi “Pravila jizni”.
Yangi filmni suratga olish ishlari Daxla shahri yaqinida bo‘lib o‘tgan. 1975-yilda Ispaniya mustamlakadan voz kechgach, hududni nazorat qilish masalasi ochiq qolgan. Shu paytdan boshlab Marokash va POLISARIO fronti (Sahroyi Kabir ozodlik fronti) o‘rtasida mojarolar boshlandi.
So‘ng Marokash G‘arbiy Sahroyi Kabirni o‘z hududining ajralmas qismi deb e’lon qilgan va hozirda uning taxminan 80 foiz qismini nazorat qiladi. Hudud rasmiy ravishda BMT tomonidan “o‘zini o‘zi boshqara olmaydigan (mustamlaka) hudud” sifatida qayd etilgan.
G‘arbiy Sahroyi Kabir xalqaro kinofestivali (FiSahara) Nolanni suratga olish ishlarini zudlik bilan to‘xtatishga chaqirdi. Festival vakillarining so‘zlariga ko‘ra, Nolan va uning jamoasi o‘z harakatlari bilan “Marokash hokimiyatining xalqqa tazyiq o‘tkazishiga beixtiyor o‘z hissasini qo‘shmoqda”.
“Daxla shahri faqat kino suratga olish uchun mos keladigan go‘zal sahrolardan iborat emas. Avvalo, bu yer bosib olingan, harbiy kuchlar tomonidan nazorat qilinadigan shahar bo‘lib, uning tub aholisi marokashlik kuchlar tomonidan shafqatsiz bosimga uchramoqda”, deydi festival tashkilotchilari.
G‘arbiy Sahroyi Kabirda avval ham yirik byudjetli suratga olish ishlari olib borilgan. Jumladan, Amazon’ning “Vaqt charxpalagi” seriali ham aynan shu hududda ishlangan.
Mazkur hududda uzoq yillardan beri xalqaro nizolar davom etmoqda. 1970-yillarning o‘rtalarida tashkil etilgan POLISARIO fronti (Segiet-el-Hamra va Rio-de-Oro xalq ozodlik fronti) Jazoir yordami bilan mustaqillik uchun qurolli kurash boshlagan edi. Mojarolar 1991-yilgacha davom etdi va BMTning tinchlikparvar missiyasi yordamida to‘xtatildi. Marokash G‘arbiy Sahroyi Kabirni o‘z hududining ajralmas qismi deb e’lon qildi va hozirda uning taxminan 80 foizini nazorat qilib keladi.
Kristofer Nolanning qadimgi yunon dostoni asosida film ishlayotgani 2024-yil dekabrida ma’lum bo‘lgan edi. Loyiha “mifologik jangari” janrida bo‘lishi va yangi IMAX texnologiyasidan foydalanib suratga olinishi aytilgan edi. Filmda Mett Deymon, Tom Holland, Zendaya, Enn Heteuey, Robert Pattinson, Lupita Niongo va Sharliz Teron ishtirok etishi kutilmoqda.
Izoh (0)