Ayni damda Toshkentdagi CAEx ko‘rgazma majmuasida “Eco Expo Central Asia 2025” birinchi xalqaro ekologik texnologiyalar ko‘rgazmasi boshlandi. Markaziy Osiyo mintaqasida ilk bor o‘tkazilayotgan keng ko‘lamli tadbir 30 dan ortiq davlatni birlashtirib, CAExni muloqot, ilg‘or tajriba almashish va “yashil” transformatsiyani ilgari surish uchun yetakchi platformaga aylantirmoqda.
Tadbirda Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov, Qozog‘iston Respublikasi Ekologiya va tabiiy resurslar vaziri Yerlan Nysanbayev, Qozog‘iston Respublikasining O‘zbekiston Respublikasidagi Favqulodda va Muxtor Elchisi Beybut Atamqulov, Qirg‘iziston Respublikasining O‘zbekistondagi Favqulodda va Muxtor Elchisining o‘rinbosari Bakyt Asangul, Tojikiston Respublikasining O‘zbekistondagi Favqulodda va Muxtor Elchisi Abdujabbor Rahmonzoda, Turkmaniston Tabiatni muhofaza qilish vaziri o‘rinbosari Nury Jumashov, Janubiy Koreyaning O‘zbekistondagi Favqulodda va Muxtor Elchisi Von Doyon, CITES konvensiyasi Bosh kotibi Ivonn Iguero, BMTning O‘zbekiston Respublikasidagi doimiy koordinatori Sabina Mahl va boshqalar ishtirok etdi.
Tadbirning ochilish marosimida nutq so‘zlagan Aziz Abduhakimov “Bugungi ko‘rgazma shunchaki texnologiyalar namoyishi emas, balki mintaqalar, tarmoqlar va davlatlar o‘rtasidagi o‘zaro chuqur hamkorlikning boshlang‘ich nuqtasidir. O‘zbekiston Markaziy Osiyoda ekologik texnologiyalarni ilgari surish bo‘yicha mintaqaviy platformaga aylanishga tayyor”, deya ta’kidladi.
Yerlan Nysanbayev “Eco Expo” ko‘rgazmasini o‘tkazishning ahamiyatini yuqori baholadi va ko‘rgazma muhim muloqot maydoni ekanligini qayd etdi.
“Ko‘rgazma dunyo bo‘ylab atrof-muhitni yaxshilashga haqiqatan ham ta’sir ko‘rsatishi mumkin bo‘lgan so‘nggi yutuqlar va innovatsiyalarni o‘zida mujassam qilgan va shuning uchun ham barchaning e’tiborini o‘ziga qaratmoqda”, — dedi Y.Nysanbayev.
Qozog‘iston vaziri, shuningdek, O‘zbekiston tomoniga taklif uchun minnatdorlik bildirib, tadbir yuqori saviyada tashkil etilganini alohida ta’kidladi.
Yo‘qolib ketish xavfi ostida turgan yovvoyi fauna va flora turlari bilan xalqaro savdo to‘g‘risidagi konvensiya (CITES) Bosh kotibi Ivonn Iguero esa Markaziy Osiyoda bunday ko‘rgazmani o‘tkazish alohida ahamiyatga ega ekanligi, chunki bu mintaqaning noyob o‘simlik va hayvonot dunyosini saqlab qolish yo‘llarini izlash imkonini berishini ta’kidladi.
"Bu faqatgina O'zbekistonga emas, butun mintaqaga daxldor muammo. Faqat sa'y-harakatlarni birlashtirgan holda 2030-yilgacha Barqaror rivojlanish maqsadlariga erishish yo'lida harakat qilishimiz mumkin", — dedi u.
Ta'kidlash joizki, “Eco Expo Central Asia 2025” nafaqat ko‘rgazma, balki ekspertlar, kompaniyalar, startaplar, davlat va xalqaro tashkilotlar vakillari eng zamonaviy va samarali ekologik yechimlarni taqdim etish uchun uchrashadigan ixtisoslashtirilgan yangi avlod platformasidir. Bu yerda iqlim barqarorligi, resurslarni tejash va toza texnologiyalarni joriy etishning asosiy masalalari muhokama qilinmoqda.
Ko‘rgazma sun’iy intellekt va yashil energiya sohasidagi innovatsiyalardan tortib, suvni tejash va ekologik ta’lim bo‘yicha yechimlargacha barqaror kelajak uchun texnologiyalarning butun spektrini qamrab oladi. Ishtirokchi davlatlar qatoriga Fransiya, Koreya Respublikasi, Tojikiston, Rossiya, Turkmaniston, Italiya, Qozog‘iston, Avstriya, Shveysariya, Saudiya Arabistoni, Germaniya, Qatar, Xitoy, Xorvatiya, Singapur, BAA, Belarus, Belgiya, Hindiston, Buyuk Britaniya, Yaponiya, Norvegiya, Vengriya, Turkiya, Gruziya, Bangladesh, Misr, Latviya va Falastin kabi davlatlar bor. Bu Markaziy Osiyoning ekologik kun tartibiga xalqaro miqyosda katta qiziqish borligini ko‘rsatadi.
Ekologiya, atrof-muhitni muhofaza qilish va iqlim o‘zgarishi vazirligi tomonidan Markaziy Osiyo mintaqasida ilk bor tashkil etilayotgan ekologik texnologiyalar ko‘rgazmasi Prezident Shavkat Mirziyoyev tashabbusi bilan e’lon qilingan “Atrof-muhitni asrash va "yashil iqtisodiyot" yili”ga bag‘ishlandi. Bu O‘zbekistonning nafaqat ichki ekologik islohotlarni jadallashtirish, balki bu boradagi xalqaro hamkorlikni kuchaytirishga intilishini ta’kidlaydi.
Ko‘rgazmada 20 dan ortiq xalqaro tashkilot va yetakchi kompaniyalar, shuningdek, Qoraqalpog‘iston Respublikasi, viloyatlar, Toshkent shahridagi vakolatxonalar, vazirlik va idoralar, xorijiy va mahalliy kompaniyalar, xalqaro moliya institutlari va donor tuzilmalar o‘z pavilyonlarini namoyish etmoqda.
Uch kun davomida mehmonlarni boy dastur: xalqaro ekspertlar ishtirokidagi plenar va panel muhokamalari, innovatsion loyihalar taqdimotlari, yashil energiya, ekoturizm, barqaror shaharlar, raqamli texnologiyalar va iqlimni moliyalashtirish bo‘yicha tematik sessiyalar, mahorat darslari, fotoko‘rgazmalar, madaniy tadbirlar va startap tanlovi kutmoqda. Qolaversa, 35 dan ortiq parallel tadbirlar, istiqbolli loyihalar taqdimoti va ekologik dasturlar bo'yicha shartnomalar imzolanishi ham bo‘lib o‘tmoqda.
"Eco Expo Central Asia 2025" ko‘rgazmasi innovatsiyalar, barqarorlik va xalqaro hamkorlikka asoslangan yangi ekologik qarashlarni shakllantirish sari qadamdir. Ko'rgazmada ishtirok etish — tinglash, ilg'or jahon tajribasini ko'rish va mintaqaning ekologik kelajagiga haqiqiy hissa qo'shish imkoniyatidir.
Reklama huquqi asosida
Izoh (0)