Londonning “Chelsi” klubi Amsterdamning “Ayaks” jamoasida to‘p surayotgan 19 yoshli himoyachi Yorrel Hato transferi bo‘yicha klub bilan kelishuvga erishdi. Bu haqda Goal nashri xabar berdi.
“Chelsi” Hatoni 40 million yevroga xarid qilishi kutilmoqda. The Athletic nashrining qo‘shimcha qilishicha, Yorrel hozirda London klubida tibbiy ko‘rikdan o‘tishga tayyorlanmoqda va uning “aristokratlar” safiga ko‘chib o‘tishi yaqin kunlarda rasman e’lon qilinishi mumkin.
“Ayaks” Hatoni 60 million yevro evaziga sotmoqchi edi, ammo muzokaralar yakunida “Chelsi” maksimal 40 million yevro taklif qila olishi bildirgan. Shuningdek, Yorrel kelajakda London klubida muvaffaqiyatli o‘ynab ketsa, amsterdamliklar turli bonuslar hamda futbolchining keyingi transferidan ulush olish imkoniga ega bo‘ladi.
Ma’lumot uchun, futbolchi o‘tgan mavsum “Ayaks” safida jami 50 uchrashuvda maydonga tushib, o‘z hisobiga 3 ta gol va 6 ta assist yozdirib qo‘ygan. Uning klub bilan shartnomasi 2028-yilning yoziga qadar amal qiladi. Transfermarkt portali Yorrelning qiymatini 35 million yevroga baholamoqda.
Eslatib o‘tamiz, o‘tgan mavsum “Chelsi” Angliya Premer Ligasida 4-o‘rinni egallab, Yevropa Chempionlar ligasida ishtirok etish huquqini qo‘lga kiritdi. Klub Yevropa Konferensiyalar Ligasi va Klublar o‘rtasidagi Jahon chempionatida ham muvaffaqiyatga erishdi.
Izoh (0)