Ozarbayjon 2024-yil dekabr oyida Qozog‘istonda Ozarbayjon havo yo‘llari (AZAL) aviakompaniyasi samolyotining qulashi munosabati bilan Rossiyaga qarshi xalqaro sud organlariga murojaat qilish uchun hujjatlarni tayyorlamoqda. Bu haqda mamlakat prezidenti Ilhom Aliyev Xankendidagi Shusha media-forumida so‘zlagan nutqida ma’lum qildi, deya xabar bermoqda Minval.
Aliyevning aytishicha, yetti oy mobaynida Ozarbayjon “Rossiya tomonidan birorta ham aniq javob olmagan”. U Ozarbayjon bosh prokurori muntazam ravishda Rossiya Tergov qo‘mitasiga so‘rovnomalar yuborishini, ammo javobda faqat “tergov davom etmoqda” degan jumla kelishini ta’kidlagan. Aliyev bunday munosabatni “samarasiz” deb baholadi.
“Biz nima sodir bo‘lganini bilamiz va buni isbotlay olamiz. Rossiya rasmiylarining ham voqeadan xabardor ekanliklarini bilamiz. Savol shundaki, nima uchun ular bunday vaziyatda har qanday qo‘shni qilishi mumkin bo‘lgan harakatni qilishmayapti”, dedi Aliyev.
Prezidentning ta’kidlashicha, Ozarbayjon aybni tan olishni, jabrlanganlar oilalariga tovon puli to‘lashni va AZAL’ga samolyot yo‘qotilgani uchun yetkazilgan zararni qoplashni talab qilmoqda. U “Malayziya havo yo‘llari”ning Boeing 777 samolyoti halokati bo‘yicha tergov o‘n yildan ortiq davom etganini eslatib, Ozarbayjon ham “qancha vaqt kerak bo‘lsa, shuncha kutishga” tayyor ekanligini bildirgan.
Ozarbayjon Prezidenti Rossiya-Ukraina mojarosiga ham munosabat bildirib, Ukrainaga qanday maslahat bera olishi haqidagi savolga shunday javob bergan.
“Hech qachon bosqinchilikka rozi bo‘lmaslik. Bu biz qilgan ishdir”, deydi Ilhom Aliyev.
Bundan avval Ozarbayjonning Minval.az nashri 2024-yil 25-dekabr kuni Grozniy shahriga yaqinlashayotgan AZAL Embraer E190 samolyoti urib tushirilgani haqida shov-shuvli ma’lumotlarni e’lon qilgandi.
O‘zi nima bo‘lgandi?
2024-yil 25-dekabr kuni Oqtov aeroportidan uch kilometr uzoqlikda Ozarbayjonning Azerbaijan Airlines (AZAL) aviakompaniyasining Embraer samolyoti ishtirokida fojiali aviahalokat yuz berdi. Boku—Grozniy reysini amalga oshirayotgan samolyot favqulodda qo‘nishga urinish chog‘ida halokatga uchradi. Bortda 62 nafar yo‘lovchi va 5 nafar ekipaj a’zosi bo‘lgan.
38 kishi halok bo‘lgan, yana 29 kishi jarohatlangan. Prezident Ilhom Aliyevning ta’kidlashicha, layner radioelektron kurash vositalari yordamida boshqarilmaydigan holatga keltirilgan va keyin Rossiya hududidan hujumga uchragan. Uchuvchilar Rossiyaning eng yaqin aeroportlaridan biriga favqulodda qo‘nishni so‘ragan, biroq ularga hamma joyda rad javobi berilgan, shundan so‘ng samolyot Kaspiy dengizini kesib o‘tib, Oqtov shahriga qulagan.
Aliyev halokat uchun javobgarlikni Rossiyaga yuklab aybdorlarni jazolashni talab qilgan. U, shuningdek, Moskvaning samolyotning havo hujumidan mudofaa tizimidan o‘qqa tutilishi faktini qushlar bilan to‘qnashuv va bortdagi gaz balloni portlashi haqidagi “bema’ni taxminlar yordamida yashirish”ga urinishlaridan g‘azablangan.
Halokatni tergov qilishda ICAO (Xalqaro fuqaro aviatsiyasi tashkiloti) konvensiyasiga muvofiq Qozog‘iston boshchilik qilmoqda. Ishda Ozarbayjon, Rossiya mutaxassislari, xalqaro ekspertlar va Embraer vakillari ishtirok etmoqda. Qora qutilar olib qo‘yilib, xalqaro ekspertlar ishtirokida rasshifrovka qilinmoqda.
Izoh (0)