AQSH Armaniston va Ozarbayjon o‘rtasidagi 32 kilometrlik Zangezur yo‘lagi ustidan nazoratni o‘z zimmasiga olmoqchi. Bu haqda TRT Global xabar berdi.
Taklif Yerevan va Boku o‘rtasidagi muzokaralardagi kelishmovchiliklarni bartaraf etishga qaratilgan. Tegishli ma’lumotni AQSHning Turkiyadagi elchisi Tom Barrak tasdiqlagan. U Vashington koridorni xususiy Amerika kompaniyasi orqali 100 yilga ijaraga olishga tayyorligini aytgan.
Ular 32 kilometrlik yo‘l uchun tortishmoqda, lekin bu hazil emas. Bu o‘n yildan beri davom etayotgan muammo. AQSH kelib shunday deydi: “Yaxshi, bu yo‘lni bizga bering. Uni biz 100 yilga ijaraga olamiz, shunda uni o‘zaro taqsimlashingiz mumkin”, dedi elchi.
Zangezur Ozarboyjonning g‘arbiy viloyatlari va uning Naxchivon eksklavini Armaniston bilan bog‘laydi. Middle East Eye xabariga ko‘ra, Armaniston tashabbusga Naxchivondagi yo‘l qismini ham kiritishni talab qilmoqda, Ozarbayjon esa bunga qarshi. Ozarbayjon, o‘z navbatida, to‘siqsiz o‘tish kafolatlarini talab qilmoqda va Yerevanning marshrut ustidan to‘liq nazoratiga qarshi chiqmoqda.
Ma’lum qilinishicha, Zangezur yo‘lagi bo‘yicha muzokaralar Armaniston va Ozarbayjon o‘rtasida imzolanadigan tinchlik bitimiga tayyorgarlik doirasida olib borilmoqda. 2025-yil mart oyiga kelib, ikki davlat bitimdagi 17 moddadan 15 tasini, jumladan, kirish (preambula) qismini ham kelishib olgan. Endi faqat xalqaro sud da’volari va uchinchi tomonlarning ishtiroki bilan bog‘liq masalalar ochiq qolgan.
Turkiya prezidenti Rajab Toyyib Erdo‘g‘on iyul oyi boshida Armanistonning yondashuvida ijobiy o‘zgarishlar bo‘lganini ta’kidlagandi.
Garchi Armaniston dastlab Zangezur yo‘lagiga qarshi chiqqan bo‘lsa-da, hozirda u iqtisodiy integratsiyaga nisbatan moslashuvchanroq yondashuvni qo‘llab-quvvatlamoqda, degan u.
Siyosatchi mintaqaning rivojlanishi nafaqat Eron uchun, balki butun Janubiy Kavkaz uchun ham manfaatli ekanini qayd etgan.
Izoh (0)