Ozarbayjonning Naftalan shahridagi sanatoriylarning birida 37 yoshli o‘zbekistonlik erkak vafot etdi. Bu haqda Minval.az nashri xabar bermoqda.
Ozarbayjon ommaviy axborot vositalari tarqatgan ma’lumotlarga ko‘ra, erkakning jonsiz tanasi sanatoriy xodimlari tomonidan uning xonasidan topilgan. Tezkor choralar natijasida marhum 1988-yilda tug‘ilgan Z. Kaforov ekani aniqlandi. Aniqlanishicha, erkak Ozarbayjonga sog‘lomlashtirish muolajalarini olish uchun borgan bo‘lgan.
Ma’lum qilinishicha, hodisa joyiga shifokorlar va tezkor-tergov guruhi chaqirilgan. Dastlabki ko‘rik xulosalariga ko‘ra, o‘lim o‘tkir yurak yetishmovchiligi tufayli yuz bergan. O‘limning aniq sababini aniqlash va barcha tafsilotlarni oydinlashtirish maqsadida tergov doirasida sud-tibbiy ekspertiza tayinlangan.
Ta’kidlanishicha, diplomatik kanallar orqali marhumning qarindoshlarini xabardor qilish va jasadni vatanga qaytarish bilan bog‘liq keyingi jarayonlarni tashkil etish ishlari amalga oshirilishi kutilmoqda.
Naftalan — Ozarbayjonning respublika bo‘ysunuvchi — kurort shahri hisoblanadi. Shahardan shifobaxsh xususiyatlari jihatidan noyob bo‘lgan naftalan nefti qazib olinadi. Naftalan konidan olinadigan neft davolash maqsadlarida qo‘llaniladigan dunyodagi yagona neft hisoblanadi. Tarkibida naftenli uglevodorodlar ko‘p bo‘lgani uchun yonmaydi va yoqilg‘i sifatida ishlatilmaydi. Naftalan vannalarini qabul qilish paytida chekish qat’iyan man etiladi, garchi neftning o‘zi oddiy neftdek yonib ketmasa-da, bu xavfli bo‘lishi mumkin.
7-iyul Turkiyada o‘zbekistonlik ofitsiant ayol otishmada boshiga o‘q tegib, halok bo‘lgani xabar qilingandi.
Izoh (0)