Rossiyada “do‘st bo‘lmagan” davlatlar taomini taklif qiladigan ovqatlanish muassasalariga soliq solish taklif qilindi. “Rossiya kommunistlari” partiyasi tegishli tashabbusni bosh vazir Mixail Mishustinga yubormoqchi. Bu haqda partiya raisi Sergey Malinkovich “Abzats” nashriga bergan intervyusida ma’lum qildi.
Rossiyaga dushmanlik munosabatida bo‘lgan mamlakatlar oshxonasini targ‘ib qilish noto‘g‘ri. Bu mamlakatlar rus oshxonasining rivojlanishiga yordam bermaydi, ularda bunday restoranlar deyarli yo‘q, dedi Malinkovich.
Uning so‘zlariga ko‘ra, birinchi navbatda italyan, fransuz, janubiy koreya, yapon, ispan va nemis oshxonalarini “obro‘sizlantirish” kerak. Ozarbayjon va turk taomlari tayyorlanadigan kafelarni soliqqa tortish masalasini ham muhokama qilish lozim
Xitoy oshxonasiga tegmaslik kerak, ular bizning do‘stlarimiz. Shuningdek, Lotin Amerikasi, Vyetnam, belorus, o‘zbek, arab va Shimoliy Koreya oshxonalariga ham. Soliq masalasiga kelsak, menimcha, pog‘onali tizim joriy etilishi lozim. Misol uchun, Fransiya, Germaniya, Italiya bizga faol qarshilik qilmoqda.
Yaponiya esa uzoq vaqtdan beri hududlarimizni qo‘lga kiritishni istaydi. Shu sababli, bu davlatlar taomlariga qo‘shimcha 12 foizlik soliq solish kerak. Qolgan davlatlarga nisbatan hozircha 10 foizdan boshlasa bo‘ladi, deya xulosa qildi siyosatchi.
Hozirda Moskva tomonidan “do‘st bo‘lmagan” davlatlar ro‘yxatiga 48 ta mamlakat kiritilgan. Ular orasida Slovakiya va Vengriyadan tashqari Yevropa Ittifoqi mamlakatlari, shuningdek, AQSH, Yaponiya, Buyuk Britaniya, Avstraliya, Ukraina, Shveysariya va Chernogoriya bor.
Izoh (0)