2026-yil mart oyidan boshlab Etihad Airways aviakompaniyasi Abu-Dabidan Toshkentga hamda Markaziy Osiyo va Kavkazorti shaharlariga parvozlarni yo‘lga qo‘yadi.
Aviakompaniya bu qarorni Wizz Air loukoster kompaniyasi 2025-yil sentyabridan mintaqaga parvozlarni to‘xtatishini e’lon qilganidan so‘ng bildirgan.
Ma’lum qilinishicha, Etihad Airways o‘z tarmog‘iga jami yettita yangi yo‘nalishni qo‘shmoqda: Olmaota (Qozog‘iston), Boku (Ozarbayjon), Buxarest (Ruminiya), Madina (Saudiya Arabistoni), Tbilisi (Gruziya), Toshkent (O‘zbekiston) va Yerevan (Armaniston).
Madinaga parvozlar 2025-yil noyabr oyida, qolgan shaharlarga esa 2026-yil mart oyida boshlanadi.
Chiptalarni allaqachon aviakompaniya saytida band qilish mumkin. Toshkentdan Abu-Dabiga parvoz narxi bir tomonga 605 dollardan (7,68 ming so‘m) boshlanadi. Bu narxga faqat 7 kg gacha bo‘lgan qo‘l yukini olish mumkin. Taqqoslash uchun: xuddi shu yo‘nalishdagi Wizz Air chiptalari narxi uch baravar arzonroq — 10 kg gacha qo‘l yuki bilan bir tomonga 67 dollar yoki 851 ming so‘mdan boshlanadi.
2025-yilda Etihad Airways Praga, Varshava, Sochi va Atlantaga parvozlarni yo‘lga qo‘ygan edi. Shuningdek, u 2026-yil yozi uchun uchta yangi mavsumiy yo‘nalishni e’lon qilgan. Ular orasida Krakov (Polsha), Salala (Ummon) va Qozon (Rossiya) bor. 2025-yil oxirigacha Etihad yana 13 ta yo‘nalishni ishga tushirishni rejalashtirmoqda.
Bundan avval Wizz Air loukoster aviakompaniyasi geosiyosiy va operatsion muammolar tufayli joriy yil sentyabr oyidan boshlab Abu-Dabi (BAA) shahridan barcha reyslarni to‘xtatishni rejalashtirganini ma’lum qilgandi.
Izoh (0)