Rossiya prezidenti matbuot kotibi Dmitriy Peskov Ozarbayjon bilan munosabatlardagi keskinlik yuzasidan izoh berdi. Bu haqda “RBK” xabar berdi.
Peskovning so‘zlariga ko‘ra, Rossiya Ozarbayjon bilan yuzaga kelgan muammolar konstruktiv tarzda hal qilinishiga umid qilmoqda. U bu muammolar “ikki tomonlama munosabatlarning umumiy ruhiga mos ravishda” bartaraf etilishi kerakligini aytdi.
Mantiq faqat bir narsani ko‘rsatadi: Rossiya va Ozarbayjon umumiy tarix, umumiy bugun va umumiy kelajak birlashtirgan eng yaqin hamkorlar, ittifoqchilar va davlatlar bo‘lib kelgan va shunday bo‘lib qolishi lozim, deya ta’kidladi Kreml vakili.
Shuningdek, u Rossiya diplomatlari Bokuda hibsga olingan rossiyaliklar bilan aloqada ekanini qo‘shimcha qildi. Ozarbayjon tomoni bilan muloqotni Tergov qo‘mitasi rahbari Aleksandr Bastrikin va bosh prokuror Igor Krasnov ham olib bormoqda.
Ikki davlat o‘rtasidagi munosabatlar nega yomonlashdi?
Davlatlar o‘rtasidagi so‘nggi keskinlik iyun oxirida Rossiyaning Yekaterinburg shahrida Ozarbayjon fuqarolari hibsga olinganidan keyin yuzaga keldi. Rossiya Tergov qo‘mitasi ularni 2001, 2010 va 2011-yillardagi qotillik va suiqasd ishlarida ayblanuvchi deb atagan. Qo‘lga olinganlarning ikki nafari vafot etgan.
Rossiya Tergov qo‘mitasi ulardan biri “yurak yetishmovchiligidan” vafot etganini, ikkinchisining o‘lim sababi aniqlanayotganini da’vo qildi. Biroq Ozarbayjon tomoni sud-tibbiy ekspertizadan so‘ng ularning tanasida jarohatlar borligini aniqladi.
Ozarbayjon hukumati fuqarolari shafqatsizlarcha kaltaklangani, etnik asosda ularga zo‘ravonlik qilinganini ta’kidladi. Holat yuzasidan Ozarbayjon qasddan odam o‘ldirish, qiynoqqa solish va mansab vakolatini suiiste’mol qilish moddalari bo‘yicha jinoiy ish qo‘zg‘atdi.
30-iyun kuni “Sputnik Ozarbayjon” agentligida yashirincha ishlagan Rossiya federal xavfsizlik xizmatining ikki xodimi qo‘lga olindi. Keyinroq ular agentlikning ijrochi direktori Igor Kartavix va bosh muharrir Yevgeniy Belousov ekani ma’lum bo‘ldi.
Rossiya Tashqi ishlar vazirligi Bokuning xatti-harakatlari tufayli Ozarbayjon elchisini chaqirtirgan va “Ozarbayjon tomonining ikki tomonlama munosabatlarni buzishga qaratilgan ongli qadamlari” munosabati bilan norozilik bildirgan.
Izoh (0)