Indoneziya Turkiyaning mahalliy ishlab chiqilgan KAAN beshinchi avlod qiruvchisi uchun ilk xorijiy xaridor bo‘lishi mumkin. Jurnalist Xoqon Chelikning aytishicha, Anqara va Jakarta 48 ta samolyot bo‘yicha qiymati 10 milliard dollarlik bitimga juda yaqin turibdi.
Agar mazkur da’vo tasdig‘ini topsa, turklarning mahalliy dasturi istiqbolli loyihaga aylanadi. Qolaversa, ikki davlat o‘rtasidagi harbiy hamkorlik aloqalari vektori Kaplan tanklari, Bayraktar dronlaridan tortib qiruvchi samolyotlarga qadar kengayib, strategik ahamiyat kasb etadi.
Hozir Indoneziya poytaxtida bo‘lib turgan Xoqon Chelik ikki davlat o‘rtasida tuziladigan shartnoma mudofaa sanoati tarixida eng yirik bitimlardan biri ekanini ta’kidladi. Unga ko‘ra, 48 ta samolyotni yetkazib berish uchun 10 yillik kelishuv imzolanadi.
Jurnalist tomonlar bu haqda bugun, 11-iyun kuni boshlangan Indo Defence xalqaro ko‘rgazmasida yakuniy qarorga kelganini ta’kidladi. Shuningdek, hujjatlarni imzolash marosimi ham ko‘rgazma doirasida o‘tkazilishini aytdi.
“Turkiya tarixidagi eng yirik kelishuvlardan biri imzolanishiga soatlar qoldi. Indoneziya 48 ta KAAN qiruvchisini xarid qiladi. 10 yillik loyiha qiymati 10 milliard dollardan oshadi. Bu stol atrofida professor doktor Haluk Gorgun, Mudofaa sanoati raisi va Indoneziya prezidenti o‘tirib, shartnomaga imzo chekishadi. Bu Turkiya respublikasi tarixida imzolangan eng yirik miqdordagi, eng ahamiyatli harbiy bitimlaridan biridir”, degan Xoqon Chelik.
Indoneziya va KAAN
Jakarta turklarning mahalliy KAAN loyihasiga qo‘shilishi shu yilning aprel oyida ma’lum bo‘ldi. Biroq Xoqon Chelikning da’vosi hozircha rasmiylar tomonidan tasdiqlanmadi. Ammo anchadan buyon Turkiyaning mudofaa sanoati bilan chuqur hamkorik qilayotgan davlat sifatida Indoneziyadan bunday qadamni kutish mumkin.
Anqara va Jakarta avval ham bir qancha loyihalarda hamkorlik qilgan. Masalan FNSS va PT Pindad kompaniyalari birgalikda Kaplan MT (Harimau) o‘rta og‘irlikdagi tankini ishlab chiqib, Indoneziya armiyasiga topshirgan.
2024-yil aprel oyida Turkiyaga rasmiy tashrif bilan kelgan Indoneziya prezidenti Prabovo Subianto ham ayni shu masalaga to‘xtalgan edi.
“Indoneziya KAAN 5-avlod qiruvchi samolyoti loyihasida ishtirok etishni, shuningdek, MILDEN suvosti kemasi loyihasida ham Turkiya mudofaa sanoati bilan hamkorlik qilishni xohlaydi. Bu imkoniyatdan foydalanmoqchimiz”, degan edi u turkiyalik hamkasbi bilan qo‘shma matbuot anjumanida.
KAAN
TAI TF KAAN turk harbiy sanoati tomonidan ishlab chiqilgan qiruvchi bo‘lib, o‘zida beshinchi avlod samolyotlariga xos xususiyatlarni mujassamlashtirgani aytiladi. Bir necha funksiyalarni baravar bajara olishi, maxsus aerodinamik tuzilish va stels qoplama sharofati bilan radarlarda sezilmaslik kabilar shular jumlasidan.
Qo‘shma Shtatlar Turkiyani F-35 dasturidan chiqarib yuborgach, turklar o‘z ishlanmasiga e’tiborni kuchaytirdi. Dastlabki prototip sinov parvozlarini allaqachon muvaffaqiyatli topshirgan. Pokiston, Ozarbayjon hamda Ukraina kabi davlatlar esa dasturda ishirok etishga qiziqish bildirgan.
Biroq ayrim ekspertlar KAAN qiruvchisining xususiyatlari beshinchi avlodga mansubligiga shubha bilan qaraydi. Ularni ayniqsa dvigatel bilan bog‘liq ba’zi savollar o‘ylantiradi.
Izoh (0)