Qozog‘istonning BAAdagi elchixonasi sobiq maslahatchisi Saken Mamash xotiniga nisbatan muntazam ravishda oilaviy zo‘ravonlik qilganlikda ayblanib, olti yil muddatga ozodlikdan mahrum qilindi. Bu haqda “Kazinform” agentligi xabar bermoqda.
Sud ma’lumotlariga ko‘ra, hozirda sobiq diplomat vaqtincha ishsiz, shuningdek, nikohdan ajrashgan. U xotinini qiynoqqa solishda aybdor deb topilish bilan birga diplomatik unvonidan ham mahrum qilingan.
O‘tgan yili Qozog‘istonning “Ne molchi.kz” jamoat fondi diplomat Saken Mamashning rafiqasi Karina Mamashning murojaatini e’lon qildi. Ayolning so‘zlariga ko‘ra, eri uni 10 yil davomida zo‘rlagan va kaltaklagan.
Ostona sudi matbuot xizmati Saken Mamashga nisbatan chiqarilgan hukm bo‘yich tushuntirish bergan. Sudda tushuntirilishicha, Saken Mamash 2014-yildan beri jabrlanuvchi bilan qonuniy nikohda bo‘lgan. Nikoh davrida jabrlanuvchi ikki farzand ko‘rgan, uy bekasi bo‘lgan, unga diplomatning rafiqasi sifatida nafaqa hisoblangan, buni mahkumning o‘zi olgan. Uydagi barcha xarajatlarni Mamash qoplagan.
“Mahkum jabrlanuvchining qarindoshlari va dugonalari bilan muloqot qilishini taqiqlagan, cheklagan, uning qo‘ng‘iroqlari, yozishmalari va harakatlanishini nazorat qilgan. Asossiz rashk tufayli mahkum davlat xizmatchisi qasamyodini qabul qilgan shaxs sifatida 2019-2024 yillar davomida muntazam ravishda Ostonada, keyinchalik BAA, Abu-Dabida bo‘lganida jismoniy zo‘ravonlik ishlatgan, jabrlanuvchining turli tana qismlari va boshiga musht bilan tan jarohati yetkazgan”, deyiladi xabarda.
Ta’kidlanishicha, prokuror Mamashga nisbatan 6 yil, jabrlanuvchi esa 7 yil muddatga ozodlikdan mahrum etish jazosini tayinlashni so‘ragan. Sudlanuvchi aybini tan olmagan.
Izoh (0)