Qozog‘iston musulmonlari boshqarmasi (QMB) Counter-Strike 2, Dota 2, GTA, League of Legends, Minecraft va Genshin Impact kabi mashhur o‘yinlarni shariat nuqtai nazaridan o‘ynash joizmi, degan savolga javob berdi. Boshqarma musulmonlarga qanday kompyuter o‘yinlarini o‘ynash ruxsat etilganini ham ma’lum qildi.
Ma’lum qilinishicha, zo‘ravonlik, qotillik, urush, xudosizlik yoki dinni masxara qilish sahnalari mavjud bo‘lgan barcha o‘yinlar qat’iyan man etilgan. Musulmonlar boshqarmasi video o‘yinlardagi azartga ham to‘xtalgan.
O‘yinda qimor unsurlari bo‘lmasligi kerak. Alloh taolo Qur’oni Karimda shunday degan: “Ey iymon keltirganlar! Albatta, xamr (aroq), qimor, butlar va (fol ochadigan) cho‘plar iflosdir. Shaytonning ishidir. Bas, undan chetda bo‘ling. Shoyadki, najot topsangiz (Moida surasi, 90-oyat), deya tushuntirgan Qozog‘iston musulmonlari boshqarmasi.
Bu bevosita Counter-Strike 2, Dota 2, GTA kabi o‘yinlarga taalluqli, chunki ularda shafqatsiz sahnalar va zo‘ravonlik unsurlari mavjud.
Nimani o‘ynash mumkin?
“Ushbu mezonlarga zid bo‘lmagan mantiqiy, rivojlantiruvchi va ta’limiy o‘yinlar ruxsat etilgan deb hisoblanishi mumkin”, deya ma’lum qildi Musulmonlar boshqarmasi va halol doiradan chiqmasa, o‘yin orqali dam olish mumkinligini bildirdi.
Idora elektron o‘yinlar quyidagi hollarda umuman taqiqlanmasligi haqida eslatma berdi:
- diniy majburiyatlarni bajarishga xalaqit bermasa;
- tarkibida qimor unsurlari bo‘lmasa;
- ruhiyat va shaxsga zarar yetkazmasa;
- haqoratli so‘zlar ishlatilmasa;
- aqlni o‘stirsa va haddan tashqari ko‘p vaqt olmasa.
Izoh (0)