Qozog‘istonning Qizilo‘rda shahrida 16 yoshli qiz sinfdoshlari tomonidan 2024-yilning fevral oyidan boshlab olti oy davomida jinsiy qullikda saqlangan, biroq bu haqda 8-avgust kuni ma’lum bo‘lgan.
![](/static/2024/08/16/photo_2024-08-16_17-41-51-WxApAADu.jpg)
Nashrga ko‘ra, mazkur vaqt davomida o‘smirlar qizni “Mefedron” ichishga majburlab, giyohvand moddalarga o‘rgatgan, uni fohishalar veb-saytida ro‘yxatdan o‘tkazishgan, turli erkaklar bilan ming martadan ortiq jinsiy aloqa qilishga majburlashgan va yana turli xil qiynoqlarga solishgan.
“Qiz vaqti-vaqti bilan videoqo‘ng‘iroq qilib, kafeda ofitsiant yoki gul do‘konida sotuvchi bo‘lib ishlayotganini aytgan. Ota-onasi u yerga borganda, qiz shunchaki videoga olib, chiqib ketganini aytishgan. Qiz ota-onasi shov-shuv ko‘tarmasligi uchun shunday qilishga majbur bo‘lganini bildirgan”, deyiladi xabarda.
Tergovning borishi
15-avgust kuni sinfdosh qizni jinsiy qullikda saqlaganlar hibsga olingani ma’lum bo‘lgan. Voyaga yetmagan gumonlanuvchi K.A.ga nisbatan qamoqqa olish tarzidagi ehtiyot chorasi so‘ralgan.
Sud tergovchining iltimosini qanoatlantirmay, voyaga yetmaganlarga nisbatan 2 oy muddatga uy qamog‘i tarzidagi ehtiyot chorasini qo‘llagan. Qizilo‘rda viloyat sudining Jinoyat ishlari bo‘yicha sudlov hay’ati jabrlanuvchining vakilidan kelib tushgan murojaatlarni ko‘rib chiqqan, gumon qilinuvchilarning harakatlarining jiddiyligini hisobga olib, jazoni almashtirish bo‘yicha apellyatsiyani qanoatlantirgan.
“Tergov sudi qarorini o‘zgartirib, gumonlanuvchilarga nisbatan 2 oy muddatga qamoqqa olish tarzidagi ehtiyot chorasini qo‘llash to‘g‘risida qaror chiqardi”, deb xabar qilgan Qizilo‘rda viloyat sudi matbuot xizmati.
Hammasi qanday boshlangan: g‘oyib bo‘lish va politsiyaning harakatsizligi
Fevral oyidan boshlab qiz uydan g‘oyib bo‘lishni boshlagan, ota-onasi politsiya, voyaga yetmaganlar ishlari bo‘yicha inspeksiya va jinoyat qidiruv bo‘limiga ariza bergan, lekin ular chora ko‘rmagan. Ota-onaning so‘zlariga ko‘ra, ularga ota-onalik huquqidan mahrum etish bilan tahdid qilingan. Natijada ota-ona farzandini o‘zlari qidira boshlagan. Ota-onaning so‘zlariga ko‘ra, maktab bu holatdan xabardor bo‘lgan.
“Hammasi qizim 10-sinfda o‘qiyotgan sinfdoshi bilan ishqiy munosabatidan boshlangan”, deydi jabrlanuvchining onasi Bolatovna.
Shu vaqt ichida qiz ota-onasi bilan bir necha bor bog‘lanib, gul do‘konida sotuvchi yoki ofitsiant bo‘lib ishlayotganini aytgan. Biroq u o‘zining aniq manzilini ko‘rsatishdan qochgan. Keyinchalik ma’lum bo‘lishicha, qiz zo‘ravonlar nazorati ostida yolg‘on gapirishga majbur bo‘lgan.
Olti oy jinsiy qullikda: zo‘ravonlik va tahdidlar
Shu vaqt ichida sinfdoshlari qizga shafqatsiz munosabatda bo‘lgan. U doimiy ravishda giyohvand moddalar iste’mol qilgan, jismoniy zarar yetkazish bilan tahdid qilingan va o‘z xohishiga qarshi harakatlar qilishga majburlangan.
Avgust oyi boshida zo‘ravon o‘smirlar qizdan katta miqdorda pul talab qila boshlagan, agar rad etsa, sochini kal qilib, qoshlarini qirib tashlash bilan tahdid qilgan. Noiloj qolgan qiz yordam so‘rab do‘stiga murojaat qilgan, u darhol ota-onasiga bu haqda xabar bergan.
Huquqni muhofaza qilish organlarining javobi va ishning hozirgi holati
Ushbu fojiali voqea jamoatchilikning katta noroziligiga sabab bo‘lib, huquqni muhofaza qilish organlari voyaga yetmaganlar huquqlarini qanchalik samarali himoya qilayotgani haqida savollar tug‘dirgan.
“Kecha Chimkentda ham xuddi shunday holat bo‘lib, ikki opa-singil 4 oy davomida zo‘rlangan! Endi Qizilo‘rda! Jinoyatning jazosiz qolishi, erta jinoyatlar, 8 yoshdan boshlab qizlar va o‘g‘il bolalarni zo‘rlashni biladigan maktab o‘quvchilari— bularning barchasi bolalar jinsiy qulligini keltirib chiqardi! Qizilo‘rda militsiyasi tomonidan tergov harakatlari olib borilmoqda. Bir qancha gumondorlar allaqachon hibsga olingan. Biz bu ish Qozog‘iston Respublikasi Bosh prokuraturasining maxsus prokurorlariga tergovga o‘tkazilishini so‘raymiz”, deb yozadi prodyuser, yozuvchi, femaktivist va “Zo‘ravonlikka qarshi jamoat harakati #Don’t SilenceKZ” jamg‘armasi asoschisi o‘z kanalida.
Izoh (0)