Qozog‘iston Transport vazirligi va Afg‘oniston Jamoat ishlari vazirligi Markaziy Osiyo va Janubiy Osiyo o‘rtasidagi temir yo‘l (Transafg‘on temir yo‘li) qurilishi va undan foydalanishning asosiy tamoyillari to‘g‘risidagi memorandumni imzoladi. Bu haqda Qozog‘iston TIV matbuot xizmati xabar bermoqda.
Ma’lum qilinishicha, mazkur memorandum Qozog‘iston Bosh vaziri o‘rinbosari — tashqi ishlar vaziri Murat Nurtleuning Afg‘onistonga tashrifi doirasida imzolangan.
Ikki tomonlama uchrashuv doirasida o‘tkazilgan muzokaralar davomida tomonlar mintaqada barqaror va o‘zaro manfaatli savdoni ta’minlashning asosiy elementi sifatida samarali transport-logistika infratuzilmasini yaratish, shu jumladan Transafg‘on yo‘nalishini rivojlantirish masalalarini batafsil muhokama qilgan.
“Shu munosabat bilan Qozog‘istonning Turg‘undi-Hirot temir yo‘li qurilishiga sarmoya kiritish niyati tasdiqlandi”, deya ta’kidlanadi tashqi ishlar vazirligi bayonotida.
“Biz Afg‘oniston bilan tovar aylanmasini 3 milliard dollarga yetkazishni maqsad qilganmiz. Buning uchun Qozog‘iston qishloq xo‘jaligi mahsulotlari, yoqilg‘i-moylash materiallari, mineral o‘g‘itlar, kimyo sanoati mahsulotlari yetkazib berishni ko‘paytirishga tayyor”, dedi Qozog‘iston TIV rahbari.
Afg‘oniston mahsulotlarini Qozog‘iston bozoriga yetkazib berishni kengaytirish masalalariga alohida e’tibor qaratilgan. So‘nggi yillarda mamlakatda Afg‘onistonda ishlab chiqarilgan yangi va quritilgan mevalar, mineral suv va alkogolsiz ichimliklar taqdim etilmoqda. Savdoni kengaytirish maqsadida ushbu mahsulotlarni Qozog‘istonning g‘arbiy hududlariga chegaradosh Turg‘undi shahri va Turkmaniston hududi orqali yetkazib berishni yo‘lga qo‘yish taklif etilgan.
Izoh (0)