Qozog‘iston Oliy sudi maktablarda ro‘mol o‘rashni taqiqlashni noqonuniy deb topdi

Qozog‘iston Oliy sudi maktablarda ro‘mol o‘rashni taqiqlashni noqonuniy deb topdi. Bu haqda huquq himoyachisi Jaslan Aytmaganbetovga tayanib, “Kursiv” xabar berdi.

Aytmaganbetov o‘quvchi qizlar darslarga hijobda qatnasha olishi, chunki Qozog‘istonda har bir bola ta’lim olish huquqiga egaligini bildirdi.

U G‘arbiy Qozog‘iston viloyatidagi maktablardan birida qiz ro‘mol o‘ragani uchun darsga kiritilmaganini aytdi. Qizning ota-onasi bolasini himoya qilgan. Natijada maktab xodimlari va o‘quvchining oilasi o‘rtasidagi nizo Oliy sudgacha yetib borgan.

Oliy sud ta’lim muassasalarida ro‘mol o‘rashni taqiqlashni noqonuniy deb topgan, chunki bolaning ta’lim olish huquqi shu asosda cheklanmasligi kerak, deyiladi xabarda.

Jaslan Aytmaganbetovga ko‘ra, shunga o‘xshash qarorlar ilgari to‘rtta viloyatning boshqa sudlari tomonidan ham tan olingan.

Vazirlik ro‘mol bilan kurashayotgan bir paytda Qozog‘istonda bolalar o‘rtasida o‘z joniga qasd qilish va zo‘ravonlik holatlari ko‘paydi, bu juda achinarli. Har qanday holatda ham, sud hokimiyati vazirlik pozitsiyasiga emas, balki qonun normalariga qarayotgani quvonarli, dedi u.