Keles temiryo‘l chegara bojxona postida madaniy boylikni olib chiqishga bo‘lgan urinishga chek qo‘yildi, deb xabar bermoqda Toshkent shahar Bojxona boshqarmasi.
Keltirilishicha, Toshkent—Almata xalqaro yo‘lovchi poyezdi orqali chet davlatga chiqib ketayotgan yo‘lovchining yuklari bojxona nazoratidan o‘tkazilgan. Shunda yuklari orasida “IZBASKAN 1969 JIL” yozuvi tushirilgan 1 dona gilam borligi aniqlanib, vaqtincha saqlovga olindi hamda holatga aniqlik kiritish maqsadida badiiy ekspertiza tayinlandi.
Madaniy meros agentligining tegishli xulosasiga ko‘ra, ushbu gilam badiiy va tarixiy ahamiyatga ega bo‘lgan madaniy boylik sifatida baholanib, O‘zbekiston hududidan olib chiqilishi mumkin emasligi ma’lum qilindi.
Mazkur holat yuzasidan tegishli hujjatlar rasmiylashtirilib, taxminiy qiymati 5 mln so‘mlik mazkur gilam sudning qonuniy qarori qabul qilinguniga qadar vaqtincha olindi.
Ma’lumot uchun, Vazirlar Mahkamasining 1999-yil 23-martdagi 131-sonli qaroriga muvofiq, 50 yil muqaddam va undan ham oldinroq yaratilgan madaniy boyliklar yurtimizdan olib chiqib ketilishiga ruxsat etilmaydi.
Hozirda ashyoviy dalil sifatida olingan buyumlar Termiz arxeologiya muzeyiga topshirilgan bo‘lib, holat yuzasidan bojxona organlari tomonidan tekshiruv harakatlari olib borilmoqda.
Surxondaryoda 267 ta qadimiy tanga va taqinchoq qismlarini boshqa davlatga olib ketmoqchi bo‘lgan fuqaro ushlangandi. Shuningdek, Buxoroda tarixiy tangalar va ko‘krak nishonlarini yashirincha Rossiyaga olib ketayotgan shaxs ushlangan.
Izoh (0)