Numbeo saytida e’lon qilingan 2025-yil yarim yilligi bo‘yicha xalqaro jinoyatchilik darajasi indeksida O‘zbekiston xavfsizlik bo‘yicha 148 ta davlat ichidan 25-o‘rinni egalladi.
Ushbu reyting veb-saytga tashrif buyurgan foydalanuvchilar tomonidan to‘ldirilgan so‘rovnomalarga asoslangan bo‘lib, ular ilmiy va davlat tashkilotlari tomonidan olib boriladigan so‘rovnomalarga o‘xshash tarzda tuzilgan. Reyting jinoyatlar indeksi va xavfsizlik indekslari asosida tuzilgan.
Jinoyatchilik indeksi — bu shaharda yoki mamlakatda jinoyatchilik darajasining umumiy ko‘rsatkichini baholovchi mezondir. U quyidagicha tasniflanadi:
- juda past: 20 dan kam;
- past: 20–40;
- o‘rtacha: 40–60;
- yuqori: 60–80;
- juda yuqori: 80 dan baland.
Jinoyatlar indeksida pastroq ball olgan mamlakat shunchalik xavfsiz hisoblanadi.
Xavfsizlik indeksi esa, asosan, jinoyatchilik indeksining teskarisi hisoblanadi. Ya’ni xavfsizlik indeksi yuqori bo‘lgan shahar juda xavfsiz deb hisoblanadi.
2025-yil birinchi yarim yilligida O‘zbekiston ushbu indeks bo‘yicha Markaziy Osiyo davlatlari orasida 73,4 indeks bilan eng xavfsiz mamlakat bo‘ldi. Qozog‘iston 73-o‘rinda (54,4), Qirg‘iziston — 101-o‘rinda (48) joylashdi. Reytingga Turkmaniston va Tojikiston kiritilmagan.
Gaiti jinoyat eng ko‘p sodir bo‘ladigan mamlakat sifatida reytingda birinchi o‘rinni oldi. Jinoyatchilik yuqori bo‘lgan davlatlar beshtaligiga Papua Yangi Gvineya (80,7), Venesuela (80,5), Afg‘oniston (75,2) va Janubiy Afrika (74,6) davlatlari kirdi.
Eng xavfsiz mamlakatlar deb esa BAA, Andorra va Qatar tan olindi.
2024-yil birinchi yarim yilligida O‘zbekiston xavfsizlik reytingida 71 indeks bilan 27-pog‘onani egallagan edi.
Izoh (0)