Olmaota sudi so‘nggi yillardagi eng shov-shuvli va uzoq davom etgan ishlardan biri — 13 kishi halok bo‘lgan hosteldagi yong‘in bo‘yicha ishni ko‘rib chiqishni yakunladi. Bu haqda Kazinform agentligi xabar bermoqda.
Ma’lum qilinishicha, tergov va sud jarayoni qariyb 9 oy davom etgan. Sud hostel direktori Adilbek Muhamediyarov va yong‘in signalizatsiyasini o‘rnatgan kompaniya egasi Aleksandr Pekelnikni aybdor deb topgan.
Aniqlanishicha, Muhamediyarov turar joy binosining birinchi qavati va yerto‘lasini noqonuniy ravishda mehmonxonaga aylantirgan. Vaholanki, hujjatlarga ko‘ra, bino faqat do‘kon uchun mo‘ljallangan bo‘lgan. Binoda ventilyatsiya mavjud bo‘lmagan, tor yo‘lakka to‘shaklar yoyib qo‘yilgan. Natijada ular birinchi bo‘lib yonib, evakuatsiya yo‘lini to‘sib qo‘ygan.
“Agar Muhamedyarov to‘shaklarni yerto‘la qavatining shamollatilmaydigan yo‘lagiga joylashtirmaganida, ular yonib ketmagan va yong‘in sodir bo‘lmagan bo‘lardi. Shu sababli, sudlanuvchi Muhamedyarovning yong‘inda undan boshqa hamma aybdor, degan da’volarini sud himoyalanishning tanlangan usuli sifatida baholaydi”, dedi sudya Yernar Qosimbekov.
Sud hukmiga ko‘ra, Muxamedyarov yong‘in xavfsizligi qoidalarini buzib, ehtiyotsizlik ortidan ikki va undan ortiq shaxsning o‘limiga sababchi bo‘lganlikda aybdor deb topilib, 5 yilga ozodlikdan mahrum etilgan.
Ikkinchi ayblanuvchi yong‘in signalizatsiyasi tizimini o‘rnatish uchun javobgar bo‘lgan Aleksandr Pekelnik esa signalizatsiya o‘rnatish ishlarini nazorat qilmagan va sifatsiz qurilmalardan foydalangani uchun aybdor deb topilib, to‘rt yilga ozodlikdan mahrum qilindi.
“Men hostel uchun hech narsa qilmaganman. Bu yerda aytilganlarning barchasi hostel uchun emas, balki boshqa maqsadda qilingan. hostel uchun bularning hammasini qayta qurish kerak edi. Bu ishlar o‘sha paytda foydalanilmayotgan bo‘sh xona uchun qilingan”, dedi Pekelnik sudda.
hosteldagi yong‘in bir yarim yil oldin 2023-yilning noyabr oyida sodir bo‘lgan edi. Yong‘in vaqtida ichkarida 72 kishi bo‘lgan. Yong‘inda 13 kishi halok bo‘lgan — to‘qqiz nafari qozog‘istonlik, ikki nafari rossiyalik va ikki nafari o‘zbekistonlik. Ularning barchasi is gazidan zaharlangan. Tergov versiyasiga ko‘ra, yong‘in yonib ketgan ortopedik to‘shakdan boshlangan.
Sud hukmiga ko‘ra, sudlanuvchilar halok bo‘lganlarning oilalariga ma’naviy zarar uchun 7 million tengedan to‘lashi kerak.
Izoh (0)