2025-yil 16–20 iyul kunlari AQShning Las-Vegas shahrida joylashgan Wynn mehmonxonasida Freestyle Chess Grand Slam turniri bo‘lib o‘tadi. Ushbu nufuzli musobaqada O‘zbekiston sharafini ikki nafar shaxmatchi — Nodirbek Abdusattorov va Javohir Sindarov himoya qiladi.
Turnirning mukofot jamg‘armasi 750 000 AQSh dollarini tashkil etadi. Unda dunyoning eng kuchli grossmeysterlari ishtirok etadi. Ular orasida jahonning amaldagi birinchi raqamli shaxmatchisi, FIDE reytingida yetakchilik qilayotgan Magnus Karlsen (Norvegiya), shuningdek AQSh vakillari — Hikaru Nakamura, Fabiano Karuana, Uesli So, Levon Aronian, Hans Niemann bor. Shuningdek, Hindistondan Arjun Erigaisi, Rameshbabu Praggnanandhaa, Vidit Gujrathi kabi kuchli shaxmatchilar ham qatnashadi.
E’tiborlisi, Qozog‘iston vakili Bibisora Assaubayeva ushbu turnir tarixida ishtirok etayotgan ilk ayol shaxmatchi bo‘ladi.
Ma’lumot uchun, Jahon shaxmat federatsiyasi (FIDE) iyun oyi yakunida e’lon qilgan reytingga ko‘ra, Nodirbek Abdusattorov 7-o‘rinni, Javohir Sindarov esa 25-o‘rinni egallagan.
Izoh (0)