Qozog‘istonning Birlashgan Arab Amirliklaridagi (BAA) elchixonasi maslahatchisi Saken Mamashning rafiqasi Karina Mamash eri unga o‘n yil davomida muntazam ravishda zo‘ravonlik qilayotganini aytdi. Bu haqda “Nemolchi.kz” xabar berdi.
Karina Mamash o‘z murojaatida eri uni, shuningdek, uni ko‘rgani kelgan opasini yana kaltaklaganini aytdi.
“Davlatimizdan yordam so‘rayman. Xavf ostidaman, uning yonida farzandlarim xavf ostida. Turmush o‘rtog‘imning menga nisbatan qilgan barcha bezoriliklari uchun diplomatik maqomidan mahrum etilishini va qamoqqa tashlanishini istayman. Jismoniy, jinsiy, hissiy, iqtisodiy, maishiy, oilaviy zo‘ravonlik”, — deydi jabrlanuvchi.
“Nemolchi.kz” ma’lumotlariga ko‘ra, Karina Mamash hozirda kasalxonada, chakka qismiga kuchli zarbalar tufayli ko‘rish qobiliyati yomonlashgan. Huquq himoyachilari Saken Mamash xotinining telefonini olib, uning opasining telefonini sindirib tashlagani va shu tariqa har ikki ayolni aloqa qilish imkoniyatidan mahrum qilgani haqida xabar berdi.
Qozog‘iston TIV munosabati
Qozog‘iston Tashqi ishlar vazirligi Respublikasining BAAdagi elchisi maslahatchisi Saken Mamash zudlik bilan chaqirib olinishini ma’lum qildi.
“Bu xodimni zudlik bilan Qozog‘istonga chaqirib olyapmiz. Keyinchalik uning ishi huquq-tartibot idoralari tomonidan ko‘rib chiqiladi. U vazirlik lavozimidan ozod qilinadi”, — dedi vazirlik xodimi Aybek Smadiyarov.
15-aprel kuni Qozog‘iston prezidenti Qosim-Jo‘mart To‘qayev oiladagi zo‘ravonlikka qarshi kurashishga qaratilgan qonunlarni imzoladi. Ayollar va bolalarga nisbatan zo‘ravonlikning har qanday holati uchun javobgarlikni kuchaytiruvchi normalar joriy etilmoqda.
Xususan, qonun urish va qasddan badanga yengil shikast yetkazganlik uchun jinoiy javobgarlikni nazarda tutadi (ilgari buning uchun ma’muriy javobgarlik belgilangan). Sog‘liqqa qasddan o‘rtacha va og‘ir shikast yetkazganlik uchun jazo kuchaytiriladi.
Bundan tashqari, bolalarga nisbatan jismoniy zo‘ravonlik va shafqatsiz munosabatda bo‘lish bilan bog‘liq ishlar, shuningdek, kaltaklash va sog‘liqqa yengil zarar yetkazish bir yil davomida takroran sodir etilsa, tomonlarning yarashish imkoniyati istisno qilinadi.
Qozog‘istonda oiladagi zo‘ravonlik uchun jinoiy javobgarlikka tortish qonuni sobiq milliy iqtisodiyot vaziri Kuandik Bishimbayev rafiqasi Saltanat Nukenovani shafqatsizlarcha qiynoqqa solib o‘ldirganlikda ayblanayotgani yuzasidan o‘tkazilayotgan sud jarayoni fonida ma’qullangandi.
Izoh (0)