Germaniyalik 23 yoshli Otremba bo‘yi 171 sm bo‘lgani uchun o‘zini past deb hisoblardi va bundan uyalardi. Ikki yildan kamroq vaqt ichida u oyoqlarini uzaytirish bo‘yicha ikkita operatsiyani boshdan kechirdi va hozirda uning bo‘yi 195 sm ga yetdi, ammo endi uning hayoti doimiy ravishda kuchli og‘riq bilan kechmoqda.
Birinchi operatsiya 2023-yilda o‘tkazilgan. Shunda Leonning son suyaklari metall tayoqchalar va tashqi fiksator yordamida 10 sm ga uzaytirildi. Har kuni konstruksiya asta-sekin suyaklarni kengaytirish uchun 1 mm ga burab qo‘yildi. Leon olti oyni nogironlar aravachasida o‘tkazdi. U operatsiya joyi yallig‘lanmasligini doimo kuzatib borishi kerak edi.
Ikkinchi operatsiya 2025-yil boshida o‘tkazildi. Bu safar boldir suyaklari ichki klik-tizimli mexanizm yordamida uzaytirildi, bu esa suyakni asta-sekin siljitdi. Leonning ta’kidlashicha, og‘riq sezilarli darajada kamroq edi. Ammo bu muolajadan keyin ham uning tiklanishi uchun bir necha oy kerak bo‘ldi. Yigit hatto qaytadan yurishni o‘rganishiga to‘g‘ri keldi.
Leon Otremba o‘zining avvalgi bo‘y uzunligi azob-uqubatlar manbai bo‘lganini tan oldi. U boshqa erkaklar va oila a’zolari bilan tushgan suratlariga qaray olmasdi. Oxir-oqibat, u ruhiy tushkunlikka tushib qoldi. Operatsiyalar unga o‘ziga bo‘lgan ishonchni qayta tiklashga yordam berdi va og‘riqqa qaramay, u kelajakda operatsiyalarni takrorlashini istisno qilmaydi.
O‘z navbatida, ortopedlar bunday operatsiyalar sog‘liq uchun katta xavf tug‘dirishi haqida ogohlantirmoqda. Albert Eynshteyn kasalxonasining shifokori Luchano Millerning aytishicha, oyoqlarni faqat tibbiy ko‘rsatmalarga ko‘ra, masalan, tug‘ma kasalliklarda uzaytirish mumkin. Uning ta’kidlashicha, operatsiya mushaklarga ta’sir qiladi va tana biomexanikasini buzadi, chunki u butun qomatni emas, balki faqat oyoqlarning uzunligini o‘zgartiradi. Mutaxassislarning so‘zlariga ko‘ra, bunday muolajalar sinish, mushaklar shikastlanishi va yallig‘lanishga olib kelishi mumkin. Millerning ta’kidlashicha, ularni faqat estetik maqsadlarda o‘tkazish o‘ta xavfli va nooqilona qaror.
Izoh (0)