Toshkentda sodir bo‘lgan kuchli shamol oqibatida daraxt fuqaroni bosib qoldi. Bu haqda “Millar” dasturida xabar berildi.
Maʼlum qilinishicha, hodisa oqibatida fuqaro vafot etgan. Shifokor Murod Qodirovning taʼkidlashicha, shifoxonaga daraxt bosib qolgan ikki nafar bemor olib kelingan.
“Ulardan biri og‘ir ahvolda olib kelingan va shifoxona qabulxonasida vafot etgan. Ikkinchi bemorimizda bosh-miya jarohati mavjud. Uzoq muddatli jarrohlik amaliyoti o‘tkazildi. Hozirda bemorning ahvoli stabil-og‘ir, reanimatsiya bo‘limida davolanmoqda”, deydi shifokor.
Maʼlumot uchun, 23-may, juma kuni tonggida poytaxtda kuchli changli shamol kuzatilgandi. Shuningdek, Toshkent shahrida 17-may kuni tushdan keyin chang bo‘roni kuzatilgan edi.
Toshkentda chang bo‘roni paytida nimalar bo‘ldi?
Toshkent shahri havoning ifloslanish darajasi bo‘yicha dunyoning yirik shaharlari orasida birinchi o‘ringa chiqdi. SSV bu vaziyatda imkon qadar ochiq havoda yurmaslikka chaqirdi. Zarurat sezganda “103” xizmatiga qo‘ng‘iroq qilib, tibbiy yordam olishlari mumkinligini bildirdi. Sanepidqo‘mita Toshkent shahar boshqarmasi ham chang payti tashqariga chiqmaslikni, ko‘chaga chiqqanda tibbiy yoki respirator taqishni so‘radi. Uyda havo namlagichlardan foydalanish yoki xonaga ho‘l sochiq ilib qo‘yish, ko‘proq suv ichish tavsiya etildi.
Noqulay ob-havo natijasida Toshkent shahri va Toshkent viloyatining bir nechta hududlarida hayot maromiga taʼsir etmaydigan ko‘ngilsiz holatlar kuzatildi. Daraxtlarning qulab tushishi, yirik shoxlarning sinishi, shuningdek, ko‘cha va yo‘laklarning ifloslanishi holatlari qayd etildi.
Izoh (0)