Buxoro viloyati Qorako‘l tumanida 2 yoshli bola tangalarni yutib yuborgani aniqlandi. Bu haqda viloyat Sog‘liqni saqlash boshqarmasi xabar berdi.
Keltirilishicha, 2023-yilda tug‘ilgan G‘iyosov Mironshox ismli bola yuqori qizilo‘ngach toraymasida yot jism qolib ketgani sababli shoshilinch qabulxona bo‘limiga olib kelindi. Bu holat e’tiborsizlik oqibatida yuzaga kelgan.
Qayd etilishicha, navbatchilikda bo‘lgan yuqori malakali shifokorlar jamoasi tezkor tibbiy yordam ko‘rsatdi. Zamonaviy tibbiy uskunalar yordamida yuqori texnologik, kam invaziv jarrohlik amaliyoti muvaffaqiyatli amalga oshirildi va bolakay hayoti saqlab qolindi.
Ayni paytda bemorning ahvoli barqaror, shifokorlar nazorati ostida qoniqarli holatda.
Bundan avval Buxoroda 11 dona mix va to‘g‘nog‘ich yutib yuborgan yigitga yordam ko‘rsatilgandi. 2005-yilda tug‘ilgan bemor ko‘ngil aynishi, oshqozon sohasida og‘riq va ovqat o‘tishining qiyinlashishi shikoyatlari bilan murojaat qilgan. U ikki kun oldin ko‘p miqdorda to‘g‘nog‘ich va mix yutganini bildirgan. Bemor psixiatr nazoratida ro‘yxatda turgan.
Bemorda zudlik bilan endoskopik jarrohlik amalga oshirilib, bosqichma-bosqich 5 dona to‘g‘nog‘ich va 6 dona mix oshqozon va 12 barmoqli ichak bo‘shlig‘idan olib tashlangan.
2025-yilning yanvarida farg‘onalik 2 yoshli qizaloqning qornidan 135 ta magnit sharcha chiqarib olingandi. O‘sha oyda qozog‘istonlik jarrohlar 4 yoshli bolaning ichaklaridan 39 ta magnit sharni olib tashlagandi. 20-fevral kuni Qozog‘istonning Olmaota shahrida jarrohlar ikki yoshli bolaning oshqozonidan 105 dona magnitli munchoqni chiqarib olgani xabar qilingandi.
Izoh (0)