Samarqand viloyat perinatal markazida O‘zbekiston sog‘liqni saqlash vazirligi hamda Germaniya hamkorlik tashkilotining O‘zbekistondagi vakolatxonasi tomonidan 8-mart — Xalqaro xotin-qizlar kuni munosabati bilan “Yuqori texnologik tibbiy asbob-uskunalardan foydalanish ayollar salomatligining garovidir” mavzusida aksiya o‘tkazildi.
Viloyat sog‘liqni saqlash boshqarmasi matbuot xizmati rahbari Eldor Muhammadiyevning “Daryo”ga ma’lum qilishicha, aksiyaning dastlabki kunida 210 nafar ayol ko‘krak bezi bo‘yicha tibbiy ko‘rikdan o‘tkazilib, 7 nafar ayolda jarrohlik amaliyoti o‘tkazilgan.
– Dasturimiz ikki yo‘nalishdan iborat bo‘lib, ginekologiya sohasida tibbiy ko‘rik va kam invaziv usulda jarrohlik amaliyotini o‘tkazamiz, – deydi Rossiya ilmiy tadqiqot tibbiyot universiteti professori L.Kappusheva. – Maqsadimiz ayollarda uchrayotgan ginekologik kasalliklarni katta jarohatlarsiz samarali davolab, farzand ko‘rishdek baxtga erishishlariga ko‘maklashishdan iborat. Mazkur jarayonda ayollar jarrohlik amaliyotidan keyin juda tez tiklanishadi.
Aksiya doirasida onkolog-mammologlar tomonidan ayollarga ko‘krak bezi saratonining kelib chiqishi bo‘yicha ham maslahatlar berib borilmoqda.
– Ko‘krak bezi saratoni onkologik kasalliklar ichida birinchi o‘rinda turadi, — deydi Respublika ixtisoslashtirilgan onkologiya va radiologiya ilmiy-amaliy tekshirish markazi Samarqand filiali mammologi Parvina Zaripova. – Afsuski, ayollarimiz kasallikning ikkinchi, uchinchi bosqichlarida murojaat qilishadi. Kasallikni birinchi bosqichida o‘z salomatliklaridagi o‘zgarishni bor-yo‘g‘i 10 foiz ayollar payqab, o‘z vaqtida murojaat qiladi. Bu kasallikni o‘z vaqtida aniqlash unga qarshi kurashning eng samarali usuli. Shu bois haftaning har shanba kuni tumanlarda ko‘rik o‘tkazamiz. Kasallik ilk bosqichda aniqlangan bemorlar 90 foiz holatda sog‘lom hayotga qaytadi. Bugungi aksiyamizning maqsadi ham ayollarimiz salomatligini asrash, ularning muammolariga yechim topishdan iborat.
Ma’lumotlarga ko‘ra, ikki kun o‘tgan tadbirda ko‘krak saratonini olidini olish maqsadida 450 nafar xotin-qiz ultratovush skriningdan o‘tkazilib, ularga konsultativ maslahatlar berildi. Xuddi shunday, 15 ta yuqori texnologiyali operatsiya o‘tkazildi.
Izoh (0)