“Agar ilik ko‘chirish amaliyoti O‘zbekistonda o‘tkazilsa, xarajatlar to‘rt barobarga qisqaradi” — bolalar onkologi bilan suhbat (foto)

Bolalar milliy tibbiyot markazining bolalar onkologi Kamol Iskandarov mutaxassislarni xorijda o‘qitish emas, balki chet ellik tajribali xodimlarni O‘zbekistonga olib kelish samaraliroq ekani haqida gapirdi.

— Yosh mutaxassislarni xorijga yuborishdan ko‘ra, u yerdagi malakali shifokorlarni yurtimizga olib kelish yaxshiroq samara beradi. Shu kungacha tibbiyot markazimizga Rossiya, Belarus, Turkiya, Janubiy Koreya va AQSH davlatlaridan shifokorlar kelishdi. Xorijlik neyroxirurg va travmatolog shifokorlarga jarrohlik amaliyotini o‘tkazish vazifasi yuklatilgandi. Ular o‘z tajribasini o‘zbek mutaxassislariga o‘rgatdi. Ular ketgach, o‘zbek shifokorlari orttirgan tajribasi orqali ko‘plab muvaffaqiyatli jarrohlik amaliyotini o‘tkazishdi. 
O‘zim ham Janubiy Koreyada tahsil olganman. U yerda “Ustozing yaxshi bo‘lsa, jarrohlik amaliyotiga olib kirib, shogirdiga yo‘l-yo‘riq ko‘rsatadi”, degan gap bor. 
Bolalar milliy tibbiyot markazida faoliyat yuritayotgan shifokorlarning deyarli barchasi ingliz tilini biladi. Bu ham mutaxassisning imkoniyatlarini oshiradi. Shaxsan men hozirgi marta rus tilidagi tibbiyotga oid kitoblarni o‘qiganimni eslolmayman. Chunki eng yaxshi tibbiyot adabiyotlari birinchi ingliz tilida chop etiladi, — deydi bolalar onkologi Kamol Iskandarov.

Shifokor xorijdagi o‘tkaziladigan jarrohlik amaliyotlari O‘zbekistonda o‘tkazilsa, bemorlarning yashash ko‘rsatgichi oshishi va ularning mablag‘i tejalishi haqida aytib o‘tdi.

— Hindistonda ilik ko‘chirish operatsiyasi 65-85 ming AQSH dollariga o‘tkaziladi. Yo‘l xarajati va yashashni hisobga olganda, 100 ming AQSH dollari sarflashga to‘g‘ri keladi. AQSH, Germaniya va Isroilda o‘tkaziladigan jarrohlik amaliyotlari esa bundan ham qimmatroq. Agar bu amaliyot O‘zbekistonda o‘tkazilsa, bor-yo‘g‘i 15-20 ming AQSH dollari sarflanadi. Bemorlarni operatsiya qildirish uchun davlat va turli xayriya fondlari ko‘maklashishadi. Ammo ularga 85 ming AQSH dollariga bitta bemorni davolatgandan ko‘ra, 20 ming AQSH dollaridan 4 ta bemorga ko‘maklashgani yaxshiroq, — deydi bolalar onkologi Kamol Iskandarov.