Германиялик 23 ёшли Отремба бўйи 171 см бўлгани учун ўзини паст деб ҳисобларди ва бундан уяларди. Икки йилдан камроқ вақт ичида у оёқларини узайтириш бўйича иккита операцияни бошдан кечирди ва ҳозирда унинг бўйи 195 см га етди, аммо энди унинг ҳаёти доимий равишда кучли оғриқ билан кечмоқда.
Биринчи операция 2023 йилда ўтказилган. Шунда Леоннинг сон суяклари металл таёқчалар ва ташқи фиксатор ёрдамида 10 см га узайтирилди. Ҳар куни конструкция аста-секин суякларни кенгайтириш учун 1 мм га бураб қўйилди. Леон олти ойни ногиронлар аравачасида ўтказди. У операция жойи яллиғланмаслигини доимо кузатиб бориши керак эди.
Иккинчи операция 2025 йил бошида ўтказилди. Бу сафар болдир суяклари ички клик-тизимли механизм ёрдамида узайтирилди, бу эса суякни аста-секин силжитди. Леоннинг таъкидлашича, оғриқ сезиларли даражада камроқ эди. Аммо бу муолажадан кейин ҳам унинг тикланиши учун бир неча ой керак бўлди. Йигит ҳатто қайтадан юришни ўрганишига тўғри келди.
Леон Отремба ўзининг аввалги бўй узунлиги азоб-уқубатлар манбаи бўлганини тан олди. У бошқа эркаклар ва оила аъзолари билан тушган суратларига қарай олмасди. Охир-оқибат, у руҳий тушкунликка тушиб қолди. Операциялар унга ўзига бўлган ишончни қайта тиклашга ёрдам берди ва оғриққа қарамай, у келажакда операцияларни такрорлашини истисно қилмайди.
Ўз навбатида, ортопедлар бундай операциялар соғлиқ учун катта хавф туғдириши ҳақида огоҳлантирмоқда. Алберт Эйнштейн касалхонасининг шифокори Лучано Миллернинг айтишича, оёқларни фақат тиббий кўрсатмаларга кўра, масалан, туғма касалликларда узайтириш мумкин. Унинг таъкидлашича, операция мушакларга таъсир қилади ва тана биомеханикасини бузади, чунки у бутун қоматни эмас, балки фақат оёқларнинг узунлигини ўзгартиради. Мутахассисларнинг сўзларига кўра, бундай муолажалар синиш, мушаклар шикастланиши ва яллиғланишга олиб келиши мумкин. Миллернинг таъкидлашича, уларни фақат эстетик мақсадларда ўтказиш ўта хавфли ва нооқилона қарор.
Изоҳ (0)