Qashqadaryoda O‘zbekiston Respublikasi Sog‘liqni saqlash vazirligi, “Sog‘lom avlod uchun” xalqaro xayriya fondi, Germaniyaning “Friedensdorf International” xalqaro tashkiloti hamkorligida 12 yoshgacha bo‘lgan bolalar tibbiy ko‘rikdan o‘tkazildi. Bu haqda O‘zA xabar bermoqda.
Foto: O‘zATibbiy ko‘rikda Qashqadaryo, Surxondaryo va Buxoro viloyatlaridan kelgan 130 dan ziyod bemor bola qatnashdi.
Ko‘rik davomida asosan tana tayanch harakat tizimi, urologik xastaliklar bilan og‘rigan, terida kuyishdan qolgan asoratlari bo‘lgan bolalar tibbiy ko‘rikdan o‘tkazilib, ularga zarur tavsiya va maslahatlar, ayrim bolalarga mamlakatimizdagi ixtisoslashgan tibbiy muassasalarda davolanish uchun yo‘llanma berildi. Tug‘ma nuqsonli va kuyish asoratlari bor bir necha bola Germaniya klinikalariga jo‘natiladigan bo‘ldi.
Foto: O‘zAUlardan biri osteomiyelit (suyak chirishi) kasalligi bilan og‘rigan g‘uzorlik 10 yoshli Adham Salimovdir. U yetti yildirki, ushbu kasallikdan aziyat chekadi.
“O‘g‘lim 3 yoshligida qattiq yiqilish natijasida boldir suyagini sindirib olgan edi. Suyaklari noto‘g‘ri bitgan ekan. Natijada bir oyog‘i kalta bo‘lib qoldi. Bunday kasallikni davolashi mumkin bo‘lgan yurtimizdagi deyarli barcha mutaxassisga ko‘rsatdim. Ikki marta Toshkentdagi shifoxonada jarrohlik amaliyoti o‘tkazildi, biroq natija bo‘lmadi. Xorijda davolatishga esa imkonim yo‘q. Shu bois bugun umid bilan germaniyalik mutaxassislar qabuliga o‘g‘limni olib keldim. Ular kasallik varaqalari va rentgen natijalarini olib ketishdi, imkon qadar yordam berishga va’da qilishdi”, —deydi Ro‘zi To‘raqulov.
Izoh (0)